നിവിന്‍ പോളിയെയും ലേഡി സൂപ്പര്‍സ്റ്റാര്‍ നയന്‍താരയെയും മുഖ്യകഥാപാത്രങ്ങളാക്കി ധ്യാന്‍ ശ്രീനിവാസന്‍ സംവിധാനം ചെയ്യുന്ന ലൗ ആക്ഷന്‍ ഡ്രാമയുടെ ഫസ്റ്റ്‌ലുക്ക് പോസ്റ്റര്‍ അണിയറ പ്രവര്‍ത്തകര്‍ പുറത്തുവിട്ടു. നടന്‍ ദിലീപാണ് തന്റെ പേജിലൂടെ പോസ്റ്റര്‍ റിലീസ് ചെയ്തത്. ചിത്രം ഈ വര്‍ഷം സെപ്റ്റംബറോടെ തീയേറ്ററുകളിലെത്തിക്കാനാണ് അണിയറ പ്രവര്‍ത്തകരുടെ നീക്കം.
ഒന്‍പത് വര്‍ഷങ്ങള്‍ക്ക് ശേഷം മലര്‍വാടി ആര്‍ട്‌സ്‌ക്ലബ്ബിലെ താരങ്ങളെല്ലാം ഒരുമിക്കുന്ന ചിത്രമെന്ന പ്രത്യേകതയും ഈ ചിത്രത്തിനുണ്ട്. നിവിന്‍, അജു വര്‍ഗ്ഗീസ്, ഹരികൃഷ്ണന്‍, ഭഗത്, നന്ദന്‍ എന്നിവര്‍ക്കൊപ്പം ശ്രാവണും ചിത്രത്തില്‍ പ്രധാന കഥാപാത്രത്തെ അവതരിപ്പിക്കുന്നത്. ഉര്‍വശി, ധന്യ ബാലകൃഷ്ണന്‍, ജൂഡ് ആന്റണി ജോസഫ് തുടങ്ങിയവരും സിനിമയില്‍ ശ്രദ്ധേയ വേഷങ്ങളിലുണ്ട്. അജു വര്‍ഗീസും വിശാഖ് സുബ്രഹമണ്യനും ചേര്‍ന്നാണ് ചിത്രത്തിന്റെ നിര്‍മ്മാണം.
2013-ല്‍ തീയേറ്ററുകളിലെത്തിയ തിര എന്ന ചിത്രത്തിലൂടെയാണ് ധ്യാന്‍ അഭിനയ രംഗത്തേക്കെത്തിയത്. പിന്നീട് കുഞ്ഞി രാമായണം, അടി കപ്പ്യാരേ കൂട്ടമണി, ഒരേ മുഖം, ഗൂഢാലോചന, കുട്ടിമാമ തുടങ്ങിയ ചിത്രങ്ങളില്‍ അഭിനയിച്ചിട്ടുണ്ട്. സച്ചിന്‍, അടി കപ്പ്യാരേ കൂട്ടമണി 2 എന്നീ ചിത്രങ്ങളാണ് ധ്യാനിന്റേതായി പുറത്തിറങ്ങാനുള്ളത്. ധ്യാന്‍ സംവിധാനം ചെയ്യുന്ന ആദ്യ ചിത്രമാണ് ലവ് ആക്ഷന്‍ ഡ്രാമ.
Read more
