സിനിമാ സീരിയല്‍ രംഗത്ത് എണ്ണം പറഞ്ഞ പ്രകടനങ്ങളിലൂടെ കൈയടി നേടിയ രവി വള്ളത്തോള്‍ തിരശീലയില്‍ മറഞ്ഞിരിക്കുകയാണ്. കോട്ടയം കുഞ്ഞച്ചന്‍, സാഗരം സാക്ഷി, നീ വരുവോളം, ഗോഡ് ഫാദര്‍ തുടങ്ങി ഇടുക്കി ഗോള്‍ഡില്‍ വരെ ശ്രദ്ധേയമായ കഥാപാത്രങ്ങളെ അവതരിപ്പിക്കാന്‍ അദ്ദേഹത്തിന് കഴിഞ്ഞിട്ടുണ്ട്. നിരവധി സിനിമകളില്‍ അഭിനയിച്ചിട്ടുണ്ടെങ്കിലും മോഹന്‍ലാലുമൊത്ത് ഒരു സിനിമയില്‍ അഭിനയിക്കാന്‍ കഴിയാത്തത് തനിക്ക് നഷ്ടമാണെന്ന് അദ്ദേഹം പറയുമായിരുന്നു. തന്റെ ഏറ്റവും വലിയ ആഗ്രഹവും അതു തന്നെയാണെന്ന് രവി മുമ്പ് അഭിമുഖങ്ങളില്‍ പറഞ്ഞിട്ടുണ്ട്.
“എന്റെ ഏറ്റവും വലിയ ആഗ്രഹമാണ്. മോഹന്‍ലാലിന്റെ കൂടെ ഇതുവരെ എനിക്ക് അഭിനയിക്കാന്‍ കഴിഞ്ഞിട്ടില്ല. ഒരേ സിനിമയില്‍ അഭിനയിച്ചിട്ടുണ്ട് പക്ഷേ നേര്‍ക്കു നേരെ നിന്ന് അഭിനയിച്ചിട്ടില്ല. വിഷ്ണുലോകത്തിലൊക്കെ ഉണ്ടങ്കിലും ഞാന്‍ വേറൊരു ക്യാരക്ടര്‍ ആയിരുന്നു. എപ്പോള്‍ ചോദിക്കുമ്പോഴും ലാല്‍ പറയും, “ചേട്ടാ എനിക്ക് നല്ല ഓര്‍മ്മയുണ്ട്. വരട്ടെ…” ഞാന്‍ എഴുതിയ കഥ സിനിമയാക്കിയപ്പോഴും ലാല്‍ ആയിരുന്നു നായകന്‍, രേവതിക്കൊരു പാവക്കുട്ടി”.
Read more
കാലാപാനിയില്‍ തനിക്ക് നല്ലൊരു വേഷം അഭിനയിക്കുന്നതിനുള്ള അവസരം ലഭിച്ചതാണെങ്കിലും സീരിയലിലെ തിരക്കുകള്‍ കാരണം അന്നതിന് കഴിഞ്ഞില്ലെന്നും രവി വള്ളത്തോള്‍ അന്ന് ഒരു അഭിമുഖത്തില്‍ പറഞ്ഞു. ദൂരദര്‍ശന്റെ പ്രതാപകാലം തൊട്ട് സീരിയല്‍ രംഗത്ത് വ്യക്തി മുദ്ര പതിപ്പിച്ച രവി കുടുംബപ്രേക്ഷകര്‍ക്കും പ്രിയങ്കരനായിരുന്നു.
