പാ രഞ്ജിത്ത്-വിക്രം കോമ്പോയില്‍ എത്തുന്ന ‘തങ്കലാന്‍’ സിനിമ ഓഗസ്റ്റ് 15ന് തിയേറ്ററുകളില്‍ എത്തുകയാണ്. വിക്രത്തിന്റെ ഞെട്ടിക്കുന്ന മേക്കോവര്‍ കൊണ്ട് ആദ്യം മുതല്‍ തന്നെ ശ്രദ്ധ നേടിയ ചിത്രമാണ് തങ്കലാന്‍. തമിഴ്, മലയാളം, തെലുങ്ക്, കന്നഡ, ഹിന്ദി ഭാഷകളിലായാണ് ചിത്രം റിലീസ് ചെയ്യുന്നത്.
ചിത്രത്തെ കുറിച്ചുള്ള പുതിയൊരു അപ്‌ഡേറ്റ് ആണ് ഇപ്പോള്‍ പുറത്തുവന്നിരിക്കുന്നത്. ചിത്രത്തിന്റെ സ്‌പെഷ്യല്‍ പ്രിവ്യൂ ഷോയെ കുറിച്ചുള്ള റിപ്പോര്‍ട്ടുകളാണ് ശ്രദ്ധ നേടുന്നത്. ‘കെജിഎഫ്’ സിനിമയിലൂടെ പാന്‍ ഇന്ത്യന്‍ ശ്രദ്ധ നേടിയ കന്നഡ സൂപ്പര്‍താരം യാഷിനായി തങ്കലാന്റെ സ്‌പെഷ്യല്‍ പ്രിവ്യൂ ഷോ അണിയറപ്രവര്‍ത്തകര്‍ ഒരുക്കുന്നതായാണ് വിവരങ്ങള്‍.
കെജിഎഫില്‍ കഥാപശ്ചാത്തലമായ കോലാര്‍ സ്വര്‍ണഖനി തന്നെയാണ് തങ്കലാന്റെയും കഥാപശ്ചാത്തലം. കഥ പറയുന്ന കാലഘട്ടവും കഥപറച്ചിലുമാണ് വ്യത്യാസം. യാഷിന് അണിയറപ്രവര്‍ത്തകര്‍ ഒരുക്കുന്ന ആദരവാണ് ചിത്രത്തിന്റെ പ്രിവ്യൂ ഷോ എന്നാണ് വിവരങ്ങള്‍.
മലയാളി താരങ്ങളായ പാര്‍വതി തിരുവോത്തും മാളവിക മോഹനനും ചിത്രത്തില്‍ പ്രധാനവേഷങ്ങള്‍ അവതരിപ്പിക്കുന്നുണ്ട്. പശുപതി, ഹരി കൃഷ്ണന്‍, അന്‍പു ദുരൈ എന്നീ താരങ്ങളും ചിത്രത്തില്‍ അണിനിരക്കുന്നുണ്ട്. സ്റ്റുഡിയോ ഗ്രീനും നീലം പ്രൊഡക്ഷന്‍സും ചേര്‍ന്നാണ് തങ്കലാന്‍ നിര്‍മ്മിക്കുന്നത്.
ജി.വി പ്രകാശ്കുമാറാണ് ചിത്രത്തിന് സംഗീതമൊരുക്കുന്നത്. അന്‍പറിവ് മാസ്റ്റേഴ്‌സ് ആണ് തങ്കലാനില്‍ ആക്ഷന്‍ കൊറിയോഗ്രഫി ചെയ്യുന്നത്. അഴകിയ പെരിയവന്‍ സംഭാഷണവും എ കിഷോര്‍ കുമാര്‍ ഛായാഗ്രഹണവും നിര്‍വഹിക്കുന്നു. എസ്.എസ് മൂര്‍ത്തിയാണ് കലാസംവിധാനം.
