ആലപ്പുഴയില്‍ അബദ്ധത്തില്‍ എലിവിഷം കഴിച്ച സ്‌കൂള്‍ വിദ്യാര്‍ത്ഥിനിയ്ക്ക് ദാരുണാന്ത്യം. ആലപ്പുഴ തകഴി കല്ലേപ്പുറത്ത് മണിക്കുട്ടി എന്ന 15കാരിയാണ് മരിച്ചത്. കുട്ടിയുടെ വീട്ടിലെ എലി ശല്യത്തെ തുടര്‍ന്ന് തേങ്ങാപ്പൂളില്‍ എലിവിഷം വച്ചിരുന്നു. എലിവിഷത്തെ കുറിച്ച് അറിയാതെ പെണ്‍കുട്ടി തേങ്ങാപ്പൂളെടുത്ത് കഴിക്കുകയായിരുന്നു.
കഴിഞ്ഞ ദിവസം സ്‌കൂള്‍ വിട്ടുവന്ന സമയത്താണ് സംഭവം നടക്കുന്നത്. ഈ സമയം കുട്ടിയുടെ വീട്ടില്‍ മാതാപിതാക്കളുണ്ടായിരുന്നില്ല. കുട്ടിയുടെ മുത്തശ്ശിക്ക് റാബിസ് വാക്‌സിനെടുത്ത ശേഷം ചലനശേഷി നഷ്ട്ടപ്പെട്ടിരുന്നു. ഇവരുടെ ചികിത്സയ്ക്കായി അമ്മയും അച്ഛനും ആശുപത്രിയില്‍ പോയ സമയത്താണ് സംഭവം.
Read more
ശാരീരികാസ്വാസ്ഥ്യങ്ങള്‍ പ്രകടിപ്പിച്ച കുട്ടിയെ ആദ്യം വണ്ടാനം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. തുടര്‍ന്ന് കുട്ടിയുടെ ആരോഗ്യനില ഗുരുതരമായതോടെ കോട്ടയം മെഡിക്കല്‍ കോളേജിലേക്ക് മാറ്റിയെങ്കിലും ജീവന്‍ രക്ഷിക്കാനായില്ല. കഴിഞ്ഞ ദിവസം രാത്രിയാണ് കുട്ടി മരിച്ചത്. പോസ്റ്റ്മോര്‍ട്ടത്തിന് ശേഷം മൃതദേഹം കുടുംബത്തിന് വിട്ടുനല്‍കും.
