തിരുവനന്തപുരം-കാസര്‍ഗോഡ് വന്ദേ ഭാരത് എക്‌സ്പ്രസിന് നേരെ വീണ്ടും ആക്രമണം. കണ്ണൂര്‍ വളപട്ടണത്ത് വെച്ചാണ് ട്രെയിന് കല്ലേറ് ഉണ്ടായത്. കാസര്‍കോട് നിന്ന് തിരുവനന്തപുരത്തേക്കുള്ള യാത്രയില്‍ വൈകിട്ട് 3.27 നായിരുന്നു സംഭവം. അപ്രതീക്ഷിത ആക്രമണത്തില്‍ ട്രെയിനിന്റെ ജനല്‍ ഗ്ലാസിന് പൊട്ടലുണ്ടായിട്ടുണ്ട്. സംഭവം ഉണ്ടായ സ്ഥലത്ത് ആര്‍പിഎഫ്, പൊലീസ് എന്നിവര്‍ സംയുക്ത പരിശോധന നടത്തുന്നുണ്ട്.
കഴിഞ്ഞ ദിവസം മലപ്പുറത്തെ തിരൂരിനും താനൂരിനും ഇടയിലുള്ള കമ്പനിപ്പടി എന്ന സ്ഥലത്തിന് സമീപത്ത് വെച്ചും വന്ദേഭാരത് ട്രെയിനിന് നേരെ കല്ലേറുണ്ടായിരുന്നു.
കാസര്‍കോട് നിന്ന് തിരുവനന്തപുരത്തേക്ക് പോകവെ തിരൂര്‍ റെയില്‍വേ സ്റ്റേഷന്‍ വിട്ട ശേഷമാണ് സി4 കോച്ചിലെ 62, 63 സീറ്റുകളുടെ ഭാഗത്ത് ആക്രമണം നടന്നത്. കല്ലേറില്‍ പുറംഭാഗത്തെ ചില്ലിന് പൊട്ടല്‍ വീണിരുന്നു.
Read more
ഷൊര്‍ണൂര്‍ സ്റ്റേഷനില്‍ വെച്ച് പൊട്ടല്‍ വീണ ഭാഗം റെയില്‍വേ അധികൃതര്‍ പരിശോധിച്ചു. പൊട്ടലുണ്ടായ ഭാഗത്ത് ഇന്‍സുലേഷന്‍ ടേപ്പ് ഒട്ടിച്ച ശേഷമാണ് ട്രെയിന് യാത്ര തുടര്‍ന്നത്. കല്ലേറ് നടത്തിയത് ആരാണെന്ന് കണ്ടെത്തിയിട്ടില്ല. സംഭവത്തില്‍ കേസ് രജിസ്റ്റര്‍ ചെയ്ത റെയില്‍വേ സുരക്ഷാസേന അന്വേഷണം നടക്കുകയാണ്. അതിനിടിയിലാണ് വീണ്ടും ആക്രമണം ഉണ്ടായിരിക്കുന്നത്. ട്രെയിനിന്റെ സുരക്ഷ വര്‍ധിപ്പിക്കുമെന്ന് റെയില്‍വേ സുരക്ഷാസേന അറിയിച്ചു.
