ക്രിസ്ത്യന്‍ നാടാര്‍ സംവരണം സ്റ്റേ ചെയ്ത സിംഗിൾ ബെഞ്ച് ഉത്തരവിനെതിരെ സംസ്ഥാന സര്‍ക്കാർ നൽകിയ അപ്പീല്‍ ഹൈക്കോടതി ഡിവിഷൻ ബെഞ്ച് തിരിച്ചയച്ചു. ഉത്തരവില്‍ ഇടപെടുന്നില്ലെന്നും സിംഗിൾ ബഞ്ച് തന്നെ കേസ് പരിഗണിക്കട്ടെ എന്നും ചീഫ് ജസ്ററിസ് അദ്ധ്യക്ഷനായ ഡിവിഷന്‍ ബഞ്ച് അറിയിക്കുകയായിരുന്നു.
സംവരണ പട്ടികയിൽ ഇല്ലാതിരുന്ന ക്രിസ്ത്യൻ നാടാർ വിഭാഗങ്ങളെ ഒ.ബി.സി പട്ടികയിൽ ഉൾപ്പെടുത്തിയത് സ്റ്റേ ചെയ്ത സിംഗിൾ ബഞ്ച് ഇടക്കാല ഉത്തരവിനെതിരെ സർക്കാർ നൽകിയ ഹർജിയാണ് ഡിവിഷൻ ബെഞ്ച് തിരിച്ചയച്ചത്. വിഷയത്തിൽ ഇടക്കാല ഉത്തരവ് മാത്രമാണ് സിംഗിൾ ബെഞ്ച് പുറപ്പെടുവിച്ചതെന്നും അതിൽ ഇടപെടാൻ ഉദ്ദേശിക്കുന്നില്ലെന്നുമാണ് ചീഫ് ജസ്റ്റിസ് അധ്യക്ഷനായ ബെഞ്ച് അറിയിച്ചത്.
പിന്നോക്ക വിഭാഗങ്ങളെ പട്ടികയിൽ ഉൾപ്പെടുത്താൻ സംസ്ഥാനങ്ങൾക്ക് അധികാരം നൽകി കേന്ദ്രം പുതിയ നിയമം കൊണ്ടുവന്നതായി സർക്കാർ അറിയിച്ചു. മറാത്ത സംവരണക്കേസിലെ സുപ്രീംകോടതി ഉത്തരവ് കണക്കിലെടുക്കാതെയാണ് സിംഗിൾ ബെഞ്ച് സംവരണം സ്റ്റേ ചെയ്തതെന്നും ചൂണ്ടിക്കാട്ടിയായിരുന്നു സർക്കാർ അപ്പീൽ.
സംവരണം സംബന്ധിച്ച പുതിയ ഭരണഘടനാ ഭേദഗതി കേസിൽ ബാധകമാകുമോ എന്ന് പരിശോധിക്കാനും ഡിവിഷന്‍ ബെഞ്ച്, സിംഗിൾ ബെഞ്ചിന് നിർദ്ദേശം നൽകി. ഇത് സംബന്ധിച്ച രേഖകൾ സിംഗിൾ ബെഞ്ചിന് മുന്നിൽ ഹാജരാക്കാൻ സർക്കാരിനോട് കോടതി ആവശ്യപ്പെട്ടു. സർക്കാർ ഹർജി സമർപ്പിച്ചാൽ വേഗത്തിൽ പരിഗണിക്കണമെന്നും കോടതി നിർദ്ദേശിച്ചിട്ടുണ്ട്.
Read more
പിന്നോക്ക പട്ടികയിൽ കൂട്ടിച്ചേർക്കൽ നടത്താൻ ഭരണഘടനയുടെ നൂറ്റിരണ്ടാം ഭേദഗതി പ്രകാരം, രാഷ്ട്രപതിയുടെ തീരുമാനം വേണമെന്നും അല്ലാത്തപക്ഷം നടപടി ഭരണഘടനാ വിരുദ്ധമാണെന്നും പ്രഥമദൃഷ്ടിയാൽ വിലയിരുത്തിയാണ് നാടാർ വിഭാഗങ്ങൾക്ക് സർക്കാർ സർവീസിൽ അധിക സംവരണം ഏർപ്പെടുത്തി ഫെബ്രുവരി ആറിന് സർക്കാർ ഇറക്കിയ ഉത്തരവ് ഹൈക്കോടതി സിംഗിൾ ബെഞ്ച് സ്റ്റേ ചെയ്തത്.
