പുന്നോല്‍ ഹരിദാസ് വധക്കേസ് പ്രതി നിജില്‍ ദാസിനെ രേഷ്മ ഒളിവില്‍ താമസിപ്പിച്ചത് പ്രതിയെന്ന് അറിഞ്ഞുകൊണ്ട് തന്നെയെന്ന് റിമാന്‍ഡ് റിപ്പോര്‍ട്ട്. പ്രതി നേരിട്ട് ആവശ്യപ്പെട്ടത് പ്രകരമാണ് വീട് നല്‍കിയത്. നിജില്‍ ദാസിനെ ഒരു വര്‍ഷമായി അറിയാമെന്നും, ഇടയ്ക്കിടെ വീട്ടില്‍ വരാറുണ്ടെന്നും രേഷ്മയുടെ മൊഴിയിലുണ്ട്. കോടതിയില്‍ സമര്‍പ്പിച്ച റിപ്പോര്‍ട്ടിലാണ് ഇക്കാര്യങ്ങള്‍ വ്യക്തമാക്കിയിരിക്കുന്നത്.
പുന്നോല്‍ അമൃത വിദ്യാലയം അധ്യാപികയാണ് രേഷ്മ. ഭര്‍ത്താവ് പ്രവാസിയായ പ്രശാന്താണ്. കഴിഞ്ഞ ദിവസമാണ് പ്രതിയെ പിണറായി പാണ്ട്യാലമുക്കിലെ വീട്ടില്‍ നിന്നും പിടികൂടിയത്. ഇതിന് പിന്നാലെ രേഷ്മയെയും പൊലീസ് അറസ്റ്റ് ചെയ്തിരുന്നു. പല ഇടങ്ങളിലായി ഒളിവില്‍ താമസിച്ചിരുന്ന നിജില്‍ വിഷുവിന് ശേഷമാണ് പ്രശാന്തിന്റെ പേരിലുള്ള പാണ്ട്യാലമുക്കിലെ വീട്ടില്‍ 17ാം തിയതി മുതല്‍ താമസിക്കാന്‍ തുടങ്ങിയത്. കുറച്ച് ദിവസം ഒളിവില്‍ കഴിയാനുള്ള സൗകര്യം ചെയ്ത് തരണമെന്ന് ആവശ്യപ്പെട്ടത് പ്രകാരമാണ് രേഷ്മ വീട് നല്‍കിയത്.
എന്നാല്‍ കൊലക്കേസ് പ്രതി ആണെന്ന് അറിഞ്ഞിരുന്നില്ലെന്നും, രേഷ്മയുടെ സുഹൃത്തിന്റെ ഭര്‍ത്താവെന്ന നിലയിലാണ് വീട് നല്‍കിയതെന്നുമാണ് രേഷ്മയുടെ പിതാവ് പറഞ്ഞത്. അതേസമയം രേഷ്മയുടെ പങ്ക് സംബന്ധിച്ച് വിശദമായ അന്വേഷണം വേണമെന്ന് പൊലീസ് ആവശ്യപ്പെട്ടു. രേഷ്മയെ വിശദമായി ചോദ്യം ചെയ്യണമെന്ന് തലശേരി കോടതിയില്‍ സമര്‍പ്പിച്ച റിമാന്‍ഡ് റിപ്പോര്‍ട്ടില്‍ ആവശ്യപ്പെട്ടു.
രേഷ്മയ്ക്ക് ഇന്നലെ തലശേരി ജുഡീഷ്യല്‍ മജിസ്ട്രേറ്റ് കോടതി ഉപാധികളോടെ ജാമ്യം അനുവദിച്ചിരുന്നു. പിണറായി, ന്യൂമാഹി സ്റ്റേഷന്‍ പരിധിയില്‍ രണ്ടാഴ്ച പ്രവേശിക്കരുത്, കേസില്‍ കുറ്റപത്രം സമര്‍പ്പിക്കുന്നതു വരെ രണ്ടാഴ്ച കൂടുമ്പോള്‍ അന്വേഷണ സംഘത്തിന് മുമ്പാകെ ഹാജരാകണം. 50,000 രൂപയുടെ രണ്ട് ആള്‍ ജാമ്യത്തിലാണ് രേഷ്മയ്ക്ക് ജാമ്യം നല്‍കിയത്.
Read more
അതേസമയം നിജില്‍ ദാസിനെ പിടികൂടിയതിന് പിന്നാലെ ഒളിവില്‍ താമസിപ്പിച്ച വീടിന് നേരെ ബോംബേറ് ഉണ്ടായിരുന്നു. ആക്രമണത്തില്‍ വീടിന് കേടുപാടുകള്‍ പറ്റി. ഹരിദാസ് വധത്തിന് പിന്നില്‍ ആര്‍എസ്എസ് പ്രവര്‍ത്തകന്‍ നിജില്‍ ദാസ് ആണെന്ന് തുടക്കം മുതല്‍ സിപിഎം ആരോപിക്കുന്നുണ്ടായിരുന്നു.
