പാലക്കാട് വരാനിരിക്കുന്ന ഉപതിരഞ്ഞെടുപ്പിന് മുന്നോടിയായി ബിജെപിയില്‍ പോര് മുറുകുന്നു. പാലക്കാട് ഉപതിരഞ്ഞെടുപ്പിലെ സ്ഥാനാര്‍ത്ഥി നിര്‍ണയവുമായി ബന്ധപ്പെട്ടാണ് പാര്‍ട്ടിയില്‍ വിഭാഗീയത ഉടലെടുത്തിരിക്കുന്നത്. ബിജെപിയിലെ ഒരു വിഭാഗം ശോഭ സുരേന്ദ്രനെ സ്ഥാനാര്‍ത്ഥിയാക്കണമെന്ന് ആവശ്യപ്പെട്ട് ഇതോടകം കേന്ദ്ര നേതൃത്വത്തിന് കത്തയച്ചിട്ടുണ്ട്.
പാലക്കാട്ടെ ശോഭ സുരേന്ദ്രന്‍ പക്ഷമാണ് ബിജെപി ദേശീയ ആധ്യക്ഷന്‍ ജെപി നദ്ദയ്ക്ക് കത്തയച്ചത്. ശോഭ സുരേന്ദ്രനെ ഉപതിരഞ്ഞെടുപ്പില്‍ സ്ഥാനാര്‍ത്ഥിയാക്കണം എന്നാവശ്യപ്പെടുന്ന കത്തില്‍ ശോഭയ്ക്ക് ഈഴവ വോട്ടുകള്‍ ലഭിക്കുമെന്നും വ്യക്തമാക്കുന്നു. അതേസമയം സി കൃഷ്ണ കുമാറിനെ സ്ഥാനാര്‍ത്ഥിയാക്കരുതെന്നും ആവശ്യപ്പെടുന്നുണ്ട്.
സി കൃഷ്ണകുമാര്‍ അഴിമതിക്കാരനാണെന്നും കത്തില്‍ പറയുന്നു. സംസ്ഥാന ജനറല്‍ സെക്രട്ടറി സി കൃഷ്ണകുമാറിനെ മത്സരിപ്പിക്കാന്‍ ഔദ്യോഗിക പക്ഷം ശ്രമം നടത്തുന്നതിനിടെയാണ് ശോഭ പക്ഷം കേന്ദ്ര നേതൃത്വത്തിന് കത്തയച്ചത്. കേന്ദ്ര ആഭ്യന്തര മന്ത്രി അമിത് ഷായ്ക്കും ശോഭ അനുകൂലികള്‍ കത്തയച്ചിട്ടുണ്ട്.
സി കൃഷ്ണകുമാറിനെതിരെ ആരോപണങ്ങളാണ് കത്തില്‍ ഉന്നയിക്കുന്നത്. സി കൃഷ്ണകുമാര്‍ തുടര്‍ച്ചയായി നാല് തവണ പൊതുതെരഞ്ഞടുപ്പില്‍ മത്സരിച്ചു. വോട്ട് നേടുന്നതിനേക്കാള്‍ പണമുണ്ടാക്കാനാണ് കൃഷ്ണകുമാറിന് താത്പര്യമെന്നാണ് കത്തിലെ ആരോപണം.
