അടുത്ത വർഷം നടക്കാനിരിക്കുന്ന ലോക്സഭാ തിരഞ്ഞെടുപ്പിന് ഒരുങ്ങാൻ സംസ്ഥാന ഘടകങ്ങളോട് ആഹ്വാനം ചെയ്ത് കോൺഗ്രസ് അധ്യക്ഷൻ മല്ലികാർജുൻ ഖാർഗെ. ഹൈദരാബാദിൽ നടക്കുന്ന കോൺഗ്രസിന്റെ വിശാല പ്രവർത്തക സമിതിയിലാണ് ഖാർഗെ തിരഞ്ഞെടുപ്പ് പ്രവർത്തനങ്ങൾ തുടങ്ങാൻ ആഹ്വാനം ചെയ്തത്. കോൺഗ്രസ് പ്രവർത്തക സമിതിയുടെ രണ്ടാം ദിനമായ ഇന്ന് നടക്കുന്ന വിശാല പ്രവർത്തക സമിതിയിൽ സംസ്ഥാന അധ്യക്ഷന്മാരും നിയമസഭാകക്ഷി നേതാക്കളും പങ്കെടുക്കുന്നുണ്ട്.
2024ൽ ബിജെപിയെ അധികാരത്തിൽ നിന്നിറക്കാൻ വിശ്രമമില്ലാതെ പണിയെടുക്കണം. നിയമസഭാ തിരത്തെടുപ്പ് നടക്കുന്ന അ‍ഞ്ച് സംസ്ഥാനങ്ങളിലും വിജയിക്കണം, വ്യക്തി താൽപര്യങ്ങൾ മാറ്റിവച്ച് പാർട്ടിയുടെ വിജയത്തിനായി പ്രവർത്തിക്കണം, മാധ്യമങ്ങളിൽ വിവാദപ്രസ്താവന നടത്തരുതെന്നും ഖാർഗെ നിർദേശിച്ചു.
കേന്ദ്ര സർക്കാരിന്റെ പ്രവർത്തനങ്ങൾക്കെതിരെ യോജിച്ച മുന്നേറ്റം വേണമെന്ന് ആഹ്വാനം ചെയ്യുന്നതായിരുന്നു പ്രവർത്തക സമിതിയുടെ ആദ്യദിനമായ ഇന്നലത്തെ ചർച്ചകൾ. കോൺഗ്രസ് ഒറ്റക്കെട്ടായി ഇന്ത്യ മുന്നണിക്കൊപ്പം ഉണ്ടാകുമെന്ന തീരുമാനവും പ്രവർത്തക സമിതിയെടുത്തു. സംസ്ഥാനങ്ങളുടെ സാഹചര്യം ചർച്ച ചെയ്യുന്ന വിശാല പ്രവർത്തക സമിതിയിൽ തെലങ്കാന, മധ്യപദേശ്, രാജസ്ഥാൻ, ഛത്തീസ്ഗഡ്, മിസോറാം തുടങ്ങി ഈ വർഷം അവസാനം തിരഞ്ഞെടുപ്പ് നടക്കുന്ന ഇടങ്ങളിൽ വിജയം നേടാനുള്ള തന്ത്രങ്ങളും സമിതി രൂപീകരിക്കും.
Read more
രാഹുൽ ഗാന്ധി അടുത്ത തവണയും വയനാട്ടിൽ മത്സരിക്കണമെന്ന് കൊടിക്കുന്നിൽ സുരേഷ് എംപി പ്രവർത്തക സമിതിയിൽ ആവശ്യപ്പെട്ടു. 2019ൽ യുഡിഎഫിന് 19 സീറ്റ് കിട്ടാൻ കാരണം രാഹുലിന്റെ സാന്നിധ്യമാണെന്നും കൊടിക്കുന്നിൽ സുരേഷ് പറ‍ഞ്ഞു. ലോക്സഭാ തിരഞ്ഞെടുപ്പിനായി പ്രത്യേക ഫോർമുല തയ്യാറാക്കണമെന്നു രമേശ് ചെന്നിത്തല സമിതിയിൽ ആവശ്യപ്പെട്ടു. ജയസാധ്യത അനുസരിച്ച് മണ്ഡലങ്ങളെ എ,ബി,സി രീതിയിൽ തരംതിരിച്ച് പ്രവർത്തിക്കണമെന്നും രമേശ് ചെന്നിത്തല പ്രവർത്തക സമിതിയിൽ പറ‍ഞ്ഞു.
