പ്രധാനമന്ത്രി നരേന്ദ്ര മോദിക്ക് അടുത്ത വർഷം 75 വയസാകുന്നതോടെ റിട്ടയർ ചെയ്യേണ്ടി വരുമെന്ന ഡല്‍ഹി മുഖ്യമന്ത്രി അരവിന്ദ് കെജ്‌രിവാളിന്റെ വിമർശനത്തിന് മറുപടിയുമായി ആഭ്യന്തര മന്ത്രി അമിത് ഷാ. ബിജെപിയിൽ അത്തരത്തിൽ ഒരു ആശയക്കുഴപ്പമില്ലെന്നും ഇത്തവണയും ഭാവിയിലും മോദി തന്നെ തുടരുമെന്ന് അമിത് ഷാ മാധ്യമങ്ങളോട് പറഞ്ഞു. 75 വയസു കഴിഞ്ഞാൽ പദവി ഒഴിയണമെന്ന് ബിജെപിയുടെ ഭരണഘടനയിൽ എവിടെയും പറഞ്ഞിട്ടില്ലെന്നും അമിത് ഷാ കൂട്ടിച്ചേർത്തു.
‘അരവിന്ദ് കെജ്‌രിവാളിനോടും അദ്ദേഹത്തിന്റെ കമ്പനിയോടും ഇന്ത്യ സഖ്യത്തോടും എനിക്ക് പറയാനുള്ളത് ബിജെപിയുടെ ഭരണഘടനയിൽ അത്തരത്തിൽ എവിടെയും എഴുതിവെക്കപ്പെട്ടിട്ടില്ല. പ്രധാനമന്ത്രി നരേന്ദ്ര മോദി തന്നെ ഈ വട്ടം പൂർത്തിയാക്കും. ഭാവിയിൽ മോദി തന്നെ രാജ്യത്തെ നയിക്കും. ബിജെപിയിൽ അത്തരത്തിൽ യാതൊരു ആശങ്കയും നിലനിൽക്കുന്നില്ല’ അമിത് ഷാ പറഞ്ഞു.
മദ്യനയക്കേസിൽ ജയിലിൽ കഴിഞ്ഞിരുന്ന അരവിന്ദ് കെജ്‌രിവാൾ ജാമ്യം ലഭിച്ച് പുറത്തു വന്നതിന് പിന്നാലെ ഇന്നലെ നടത്തിയ വാർത്താ സമ്മേളനത്തിലാണ് തിരഞ്ഞെടുപ്പ് പ്രചരണ വിഷയം തന്നെ മാറ്റി മറിച്ച ചോദ്യം ഉന്നയിച്ചത്. ഇന്ത്യാ സഖ്യത്തിന്റെ പ്രധാനമന്ത്രി സ്ഥാനാർഥിയെ കുറിച്ചു ചോദ്യമുന്നയിക്കുന്നവരോടു തിരിച്ചു ചോദിക്കാൻ ആഗ്രഹിക്കുന്നുവെന്ന മുഖവുരയോടെയാണു കെജ്‌രിവാൾ വിഷയം ഉന്നയിച്ചത്. ‘ആരാണ് നിങ്ങളുടെ പ്രധാനമന്ത്രി സ്ഥാനാർഥി. മോദിക്ക് അടുത്ത വർഷം സെപ്റ്റംബർ 17ന് 75 വയസ് തികയും. 75 വയസു പിന്നിട്ടവർ ഒഴിയണമെന്ന വ്യവസ്ഥ അദ്ദേഹം തന്നെ 2014 ൽ കൊണ്ടുവന്നു. അമിത് ഷായ്ക്കു വേണ്ടിയാണ് അദ്ദേഹം വോട്ടുതേടുന്നത്. മോദി നൽകുന്ന ഗാരന്റികൾ അമിത് ഷായ്ക്കു പൂർത്തിയാക്കാൻ കഴിയുമോ?’- എന്നായിരുന്നു കേജ്‌രിവാളിന്റെ ചോദ്യം.
75 വയസു പിന്നിട്ടവർ ഒഴിയണമെന്ന വ്യവസ്ഥയിൽ എൽകെ അഡ്വാനി, മുരളി മനോഹർ ജോഷി, സുമിത്ര മഹാജൻ എന്നിവരെല്ലാം വിരമിച്ചുവെന്നും ജയിച്ചാലും മോദി അടുത്ത വർഷം വരെ മാത്രമേ പ്രധാനമന്ത്രി പദത്തിലുണ്ടാകുവെന്നും മോദി വോട്ടു തേടുന്നത് അമിത് ഷായെ പ്രധാനമന്ത്രിയാക്കാനാണെന്നും കെജ്‌രിവാൾ പറഞ്ഞു. അതിനായി യുപി മുഖ്യമന്ത്രി യോഗി ആദിത്യനാഥിനെ ഒതുക്കാനുള്ള ശ്രമം അണിയറയിൽ നടക്കുന്നതായും കെജ്‌രിവാൾ ആരോപിച്ചു.
Read more
ഇതു സംബന്ധിച്ച മാധ്യമപ്രവർത്തകരുടെ ചോദ്യത്തിനാണു അമിത് ഷാ മറുപടി നൽകിയത്. ഇന്നലെ രാവിലെ ഹൈദരാബാദിൽ തെലങ്കാന മുഖ്യമന്ത്രി രേവന്ത് റെഡ്ഡിയും സമാന വിഷയം ഉന്നയിച്ചിരുന്നു. മോദി 75–ാം വയസ്സിൽ വിരമിക്കാൻ തയാറാണോയെന്നായിരുന്നു ചോദ്യം.
