ഇന്ത്യന്‍ ഓവര്‍സീസ് കോണ്‍ഗ്രസ് ചെയര്‍മാന്‍ സാം പിട്രോഡ രാജ്യത്തെ ജനങ്ങളെ കുറിച്ച് നടത്തിയ പരാമര്‍ശം വിവാദത്തില്‍. രാജ്യത്തിന്റെ വൈവിധ്യത്തെ കുറിച്ച് നടത്തിയ അഭിപ്രായ പ്രകടനത്തിനിടെയായിരുന്നു വിവാദ പരാമര്‍ശം. ദക്ഷിണേന്ത്യക്കാരെയും കിഴക്കന്‍ ഇന്ത്യക്കാരെയും കുറിച്ച് നടത്തിയ പരാമര്‍ശമാണ് വിവാദങ്ങള്‍ക്ക് കാരണമായത്.
ദക്ഷിണേന്ത്യക്കാര്‍ക്ക് ആഫ്രിക്കക്കാരുമായി രൂപ സാദൃശ്യമുണ്ടെന്നും കിഴക്കന്‍ ഇന്ത്യക്കാര്‍ ചൈനക്കാരെ പോലെയാണെന്നും പറഞ്ഞ സാം ഉത്തരേന്ത്യക്കാര്‍ വെള്ളക്കാരെ പോലെയാണെന്നും പടിഞ്ഞാറുള്ളവര്‍ അറബികളെ പോലെയാണെന്നുമായിരുന്നു സാം പിട്രോയുഡെ പരാമര്‍ശം.
മെയ് 2ന് സ്റ്റേറ്റ്മാന്‍ എന്ന മാധ്യമത്തിന് നല്‍കിയ അഭിമുഖത്തിലായിരുന്നു സാമിന്റെ വിവാദ പരാമര്‍ശം. സംഭവത്തിന് പിന്നാലെ സാമിന്റെ പരാമര്‍ശത്തില്‍ വിമര്‍ശനവുമായി ബിജെപി രംഗത്തെത്തി. വര്‍ണത്തിന്റെ പേരില്‍ കോണ്‍ഗ്രസ് ജനങ്ങളെ വേര്‍തിരിച്ച് കാണുന്നുവെന്നാണ് ബിജെപിയുടെ ആരോപണം.
Read more
ഇതിന് പിന്നാലെ സാമിനെ തള്ളിപ്പറഞ്ഞ് കോണ്‍ഗ്രസും രംഗത്തെത്തിയിട്ടുണ്ട്. സാം പിട്രോഡയുടെ പരാമര്‍ശം നിര്‍ഭാഗ്യകരവും അസ്വീകാര്യവുമാണെന്ന് കോണ്‍ഗ്രസ് ജനറല്‍ സെക്രട്ടറി ജയറാം രമേശ് വ്യക്തമാക്കി. സാമിന്റെ പ്രസ്താവനയുമായി കോണ്‍ഗ്രസ് പാര്‍ട്ടിയ്ക്ക് ബന്ധമില്ലെന്നും ജയറാം രമേശ് അറിയിച്ചു.
