തമിഴ്നാട്ടില് എഐഎഡിഎംകെ-എന്‍ഡിഎ സഖ്യം വീണ്ടും രൂപപ്പെട്ടതിന് പിന്നാലെ പരിഹാസവുമായി തമിഴ് വെട്രികഴകം സ്ഥാപകനും നടനുമായ വിജയ്. കഴിഞ്ഞ ദിവസമാണ് കേന്ദ്ര മന്ത്രി അമിത്ഷാ എഐഎഡിഎംകെ നേതാക്കളുമായി നടത്തിയ ചര്‍ച്ചയ്ക്ക് പിന്നാലെ വീണ്ടും സഖ്യം രൂപീകരിച്ചതായി പ്രഖ്യാപനമുണ്ടായത്.
എഐഎഡിഎംകെയെ ബിജെപി പങ്കാളിയാക്കിയതില്‍ അത്ഭുതപ്പെടാനില്ലെന്നായിരുന്നു അമിത്ഷായുടെ പ്രഖ്യാപനത്തിന് പിന്നാലെ വിജയുടെ പരിഹാസം. ബിജെപിയുടെ പരസ്യ പങ്കാളിയാണ് അണ്ണാ ഡിഎംകെ. ഈ കൂട്ടുകെട്ടിനെ ജനങ്ങള്‍ നേരത്തെ തള്ളിയതാണ്. ഡിഎംകെ നേരത്തേ മുതല്‍ ബിജെപിയുടെ രഹസ്യ പങ്കാളിയാണെന്നും വിജയ് പറഞ്ഞു.
എഐഎഡിഎംകെ സ്ഥാപകന്‍ എംജിആറിന്റെ ആശയങ്ങളില്‍നിന്ന് എത്രയോ അകലെയാണ് ഇപ്പോള്‍ ഈ പ്രസ്ഥാനം. എംജിആറിന്റെ അനുഗ്രഹം ഇപ്പോള്‍ തമിഴ് വെട്രി കഴകത്തിനൊപ്പമാണ്. നിയമാസഭാ തിരഞ്ഞെടുപ്പില്‍ ടിവികെയും ഡിഎംകെയും തമ്മിലാണ് പോരാട്ടം. അവിടെ എഐഎഡിഎംകെയ്ക്ക് സ്ഥാനമില്ലെന്നും വിജയ് കൂട്ടിച്ചേര്‍ത്തു.
2026ല്‍ തമിഴ്നാട്ടില് എന്‍ഡിഎ സര്‍ക്കാര്‍ രൂപവത്കരിക്കുമെന്ന് കേന്ദ്ര ആഭ്യന്തരമന്ത്രി അമിത് ഷാ കഴിഞ്ഞ ദിവസത്തെ വാര്‍ത്താ സമ്മേളനത്തില്‍ അവകാശപ്പെട്ടിരുന്നു. ദേശീയതലത്തില്‍ പ്രധാനമന്ത്രി നരേന്ദ്രമോദിയും തമിഴ്നാട്ടില് പളനിസ്വാമിയും തിരഞ്ഞെടുപ്പിന് നേതൃത്വം നല്‍കും. പളനിസ്വാമിയായിരിക്കും സഖ്യസര്‍ക്കാരിനെ നയിക്കുകയെന്നും അമിത് ഷാ പറഞ്ഞു.
Read more
സംസ്ഥാന അധ്യക്ഷപദവിയൊഴിയുന്ന അണ്ണാമലൈയെ ദേശീയതലത്തിലേക്ക് ഉയര്‍ത്തുമെന്നും അമിത് ഷാ സൂചന നല്‍കുകയുണ്ടായി. അണ്ണാമലൈയ്ക്കു പകരം നൈനാര്‍ നാഗേന്ദ്രനെ ബിജെപി സംസ്ഥാന അധ്യക്ഷനായി തീരുമാനിച്ചതിനു പിന്നാലെയാണ് വെള്ളിയാഴ്ച സഖ്യപ്രഖ്യാപനമുണ്ടായത്.
