‘യുക്രെയ്ൻ എന്നെങ്കിലും റഷ്യൻ ആയേക്കാം’ എന്ന പരാമർശവുമായി യു.എസ് പ്രസിഡന്റ് ഡോണൾഡ് ട്രംപ്. ഈ ആഴ്‌ച അവസാനം ഉക്രേനിയൻ പ്രസിഡൻ്റ് വ്ളോദിമിർ സെലെൻസ്ക‌ിയെ കാണാൻ യു.എസ് വൈസ് പ്രസിഡൻ്റ് ജേഡി വാൻസ് തയ്യാറെടുക്കുന്നതിനിടെയാണ് ട്രംപിന്റെ പ്രസ്താവന.
‘ഫോക്സ് ന്യൂസി’ന് നൽകിയ അഭിമുഖത്തിൽ റഷ്യയുമായുള്ള മൂന്നു വർഷത്തോളം നീണ്ട യുദ്ധം അവസാനിപ്പിക്കാൻ പ്രേരിപ്പിക്കുന്ന സ്വരത്തിൽ ട്രംപ് സംസാരിച്ചു. ‘ചിലപ്പോൾ അവർ ഒരു കരാർ ഉണ്ടാക്കിയേക്കാം. അല്ലെങ്കിൽ കരാർ ഉണ്ടാക്കിയേക്കില്ല. ചിലപ്പോൾ അവർ ഒരു ദിവസം റഷ്യൻ ആയേക്കാം. അല്ലെങ്കിൽ അവർ ഒരു ദിവസം റഷ്യൻ ആയേക്കില്ല’ – എന്നായിരുന്നു ട്രംപിൻ്റെ വാക്കുകൾ.
അതോടൊപ്പം കീവിലെ അപൂർവ പ്രകൃതി വിഭവങ്ങൾക്കുമേൽ ട്രംപ് കണ്ണെറിയുകയും ചെയ്തു. യുക്രെയ്നുള്ള യു.എസ് എയ്‌ഡിനു പകരമായി അവിടെയുള്ള അപൂർവ ധാതുക്കൾ കൊയ്യുന്നതിന് അഭിമുഖത്തിൽ ട്രംപ് ഊന്നൽ നൽകി. ‘യുക്രെയ്‌നിലേക്കുള്ള പണമെല്ലാം അവിടെ തന്നെ ഉണ്ടാകും. എനിക്ക് അത് തിരികെ വേണമെന്ന് ഞാൻ പറയുന്നു. 500 ബില്യൺ ഡോളർ വിലമതിക്കുന്ന അപൂർവ ഭൂമി പോലെ തത്തുല്യമായത് വേണമെന്ന് ഞാൻ അവരോട് പറയുന്നു’ -ട്രംപ് പറഞ്ഞു.
Read more
അതേസമയം യുദ്ധം അവസാനിപ്പിക്കുന്നതിനായി റഷ്യയ്ക്ക് ഭൂമി കൈമാറ്റം വാഗ്ദാനം ചെയ്യാൻ ഉക്രേനിയൻ പ്രസിഡന്റ് വോളോഡിമർ സെലെൻസ്‌കി സന്നദ്ധത പ്രകടിപ്പിച്ചു. 2022 ലെ റഷ്യയുടെ അധിനിവേശത്തെത്തുടർന്ന് പ്രദേശം വിട്ടുകൊടുക്കാൻ ആദ്യം വിസമ്മതിച്ചെങ്കിലും, ഗൗരവമേറിയ ചർച്ചകളുടെ പ്രാധാന്യം സെലെൻസ്‌കി ഇപ്പോൾ ഊന്നിപ്പറയുന്നു. മ്യൂണിക്ക് സുരക്ഷാ സമ്മേളനത്തിൽ യുഎസ് വൈസ് പ്രസിഡന്റ് ജെ ഡി വാൻസുമായി സെലെൻസ്‌കി കൂടിക്കാഴ്ച നടത്തും. അവിടെ അദ്ദേഹം ഉക്രെയ്‌നിന്റെ സുരക്ഷാ ആശങ്കകളും യൂറോപ്യൻ പങ്കാളികളിൽ നിന്ന് ഗ്യാരണ്ടി നേടുന്നതിലെ വെല്ലുവിളികളും ചർച്ച ചെയ്യും.
