ഇന്ത്യൻ ക്രിക്കറ്റ് ടീമിലെ ഏറ്റവും വെടിക്കെട്ട് ബാറ്റിംഗ് പ്രകടനം നടത്തുന്ന താരമാണ് സഞ്ജു സാംസൺ. എന്നാൽ ടീമിൽ ഏറ്റവും കൂടുതൽ തഴയപ്പെടുന്നതും അദ്ദേഹമാണ്. ഇത്തവണ നടന്ന ദുലീപ് ട്രോഫിയിൽ ഗംഭീര പ്രകടനം പുറത്തെടുക്കാൻ താരത്തിന് സാധിച്ചിട്ടുണ്ട്. രണ്ട് മത്സരങ്ങളിൽ നിന്നായി അദ്ദേഹം 196 റൺസ് ആണ് നേടിയെടുത്തത്. എന്നാൽ ബിസിസിഐ പ്രഖ്യാപിച്ച ഇറാനി കപ്പിനുള്ള ടീമിൽ സ്ഥാനം ലഭിക്കാൻ സഞ്ജുവിന് സാധിച്ചില്ല.
സഞ്ജുവിന്റെ ബാറ്റിംഗ് ശൈലി വെച്ച് നോക്കുകയാണെങ്കിൽ അദ്ദേഹത്തിന്റെ റോൾ മോഡൽ ആക്കേണ്ടത് എ.ബി ഡിവിലിയേഴ്‌സിനെയോ സെവാഗിനെയോ ആണ്. എന്നാൽ തന്റെ റോൾ മോഡൽ ആരാണെന്ന് അദ്ദേഹം ഇപ്പോൾ വെളുപ്പെടുത്തിയിരിക്കുകയാണ്. സഞ്ജു റോൾ മോഡൽ ആയി കാണുന്ന താരം വിരാട് കോഹ്ലിയാണ്. അദ്ദേഹത്തെ കുറിച്ച് സഞ്ജു സംസാരിച്ചു.
സഞ്ജു സാംസൺ പറയുന്നത് ഇങ്ങനെ:
“വിരാട് ഭായിക്കൊപ്പം ആദ്യമായി ഡ്രസിങ് റൂം പങ്കിട്ടത് ഇപ്പോഴും മറക്കാനാവില്ല. മത്സരത്തെ വളരെ ഗൗരവമായി കാണുന്ന താരങ്ങളിലൊരാളാണ് കോലി. മറ്റ് സമയങ്ങളില്‍ വളരെ ശാന്തനും രസികനുമാണ് അദ്ദേഹം. കൂടെയുള്ളവര്‍ക്ക് വലിയ പിന്തുണ നല്‍കുന്നതോടൊപ്പം അവരെ സന്തോഷിപ്പിക്കാനും കോലി ആഗ്രഹിക്കുന്നു. കോലി ഭായിയും രവി സാറും ഉണ്ടായിരുന്ന സമയത്ത് ഇന്ത്യന്‍ ഡ്രസിങ് റൂം വളരെ പോസിറ്റീവായിരുന്നു. ലോകത്തിലെ ഏറ്റവും മികച്ച താരങ്ങളിലൊരാളാണ് കോലി. അദ്ദേഹമാണ് എന്റെ റോൾ മോഡൽ” സഞ്ജു സാംസൺ പറഞ്ഞു.
Read more
ടെസ്റ്റ് മത്സരത്തിന് ശേഷം നടക്കാൻ പോകുന്ന ടി-20 മത്സരങ്ങൾക്ക് വേണ്ടിയുള്ള ഇന്ത്യൻ സ്‌ക്വാഡിനെ ഇത് വരെ ബിസിസിഐ പ്രഖ്യാപിച്ചിട്ടില്ല. അതിൽ സഞ്ജു ഉണ്ടാകും എന്നാണ് വരുന്ന റിപ്പോട്ടുകൾ സൂചിപ്പിക്കുന്നത്. അതിന് വേണ്ടിയായിരിക്കും താരത്തിനെ ഇറാനി കപ്പിൽ നിന്നും മാറ്റി നിർത്തിയത് എന്നാണ് ആരാധകരുടെ വിലയിരുത്തൽ. വരും ദിവസങ്ങളിൽ സഞ്ജു തിരികെ ഇന്ത്യൻ ജേഴ്സിയിൽ കളിക്കുമോ ഇല്ലയോ എന്ന കാര്യത്തിൽ ഔദ്യോഗീക വിവരങ്ങൾ ലഭിക്കും.
