2018 ലെ ഇന്ത്യന്‍ പ്രീമിയര്‍ ലീഗില്‍ മലയാളി പേസ് ബൗളര്‍ ബേസില്‍ തമ്പിയെ സ്വന്തമാക്കി സണ്‍ റൈസേഴ്‌സ് ഹൈദരാബാദ്. 30 ലക്ഷം രൂപ അടിസ്ഥാന വിലയുണ്ടായിരുന്ന തമ്പിയെ 95 ലക്ഷം രൂപയ്ക്കാണ് ഹൈദരാബാദ് തങ്ങളുടെ ടീമിലെത്തിച്ചത്. കഴിഞ്ഞ സീസണില്‍ ഗുജറാത്ത് ലയണ്‍സിന്റെ താരമായിരുന്നു ഈ കേരളാ താരം.
ഇന്ത്യന്‍ പ്രീമിയര്‍ ലീഗ് പതിനൊന്നാം സീസണിലെ താരങ്ങളെ തിരഞ്ഞെടുക്കുന്നതിനുള്ള ലേലത്തിന്റെ ആദ്യ ദിനത്തില്‍ മികച്ച പ്രകടനം നടത്തുന്ന കളിക്കാരെ തിരഞ്ഞുപിടിക്കുകയായിരുന്നു ടീമുകള്‍. ഏറ്റവും പ്രധാനപ്പെട്ട താരങ്ങളെ നിലനിര്‍ത്തിയ ടീമുകളില്‍ മിക്കവയും ലേലത്തിനു വിട്ട സൂപ്പര്‍താരങ്ങളില്‍ മിക്കവരെയും സ്വന്തം തട്ടകത്തില്‍ തന്നെ തിരികെ എത്തിച്ചു.
Read more
ഇത്തവണ ഇന്ത്യന്‍ താരങ്ങളില്‍ ഏറ്റവും കൂടുതല്‍ വില ലഭിച്ച ആദ്യ നാലു പേരില്‍ മൂന്നു താരങ്ങളും പഞ്ചാബിലാണ്. ലോകേഷ് രാഹുല്‍ (11 കോടി), രവിചന്ദ്രന്‍ അശ്വിന്‍ (7.6 കോടി), കരുണ്‍ നായര്‍ (5.6കോടി) എന്നിവരെയാണ് പഞ്ചാബ് സ്വന്തമാക്കിയത്. മനീഷ് പാണ്ഡെയെ സണ്‍റൈസേഴ്സ് ഹൈദരാബാദും 11 കോടി രൂപയ്ക്കാണ് ടീമിലെത്തിച്ചത്.
