ഇപ്പോൾ നടക്കുന്ന ബോർഡർ ഗവാസ്കർ ട്രോഫിയിൽ നാടകീയ സംഭവ വികാസങ്ങൾക്കാണ് ക്രിക്കറ്റ് ആരാധകർ സാക്ഷിയാകുന്നത്. ഇന്ത്യൻ ക്യാപ്റ്റൻ രോഹിത് ശർമ്മ തന്റെ ക്യാപ്റ്റൻ സ്ഥാനം പേസ് ബോളർ ജസ്പ്രീത് ബുംറയ്ക്ക് കൈമാറി. രോഹിതിന്റെ കീഴിൽ ഇറങ്ങിയ മൂന്നു ടെസ്റ്റ് മത്സരങ്ങളിലും ഇന്ത്യക്ക് വിജയിക്കാനായില്ല, കൂടാതെ ബാറ്റിംഗിൽ രോഹിത് വളരെ ദയനീയമായ പ്രകടനവുമാണ് കാഴ്ച വെച്ചത്. ഈ കാരണങ്ങളാൽ രോഹിത് അടുത്ത മത്സരത്തിൽ നിന്ന് പിന്മാറുന്നതായി സിലക്ടർമാരെ അറിയിച്ചു.
ഇന്ത്യൻ ടെസ്റ്റ് ക്യാപ്റ്റനെന്ന നിലയിൽ രോഹിതിന് ഇതുവരെ ഓസ്‌ട്രേലിയയിൽ ഒരു മത്സരം പോലും ടീമിനെ വിജയിപ്പിക്കാൻ സാധിച്ചിട്ടില്ല. ഈ പരമ്പരയിൽ ഇതുവരെ ഒരു മത്സരം ഇന്ത്യ ജയിച്ചത് ബുംറയുടെ ക്യാപ്റ്റൻസിയിൽ ആയിരുന്നു.
ഗൗതം ഗംഭീർ നടത്തിയ വാർത്താ സമ്മേളനത്തിൽ അവസാന ടെസ്റ്റ് മത്സരത്തിൽ രോഹിത് കളിക്കാനുള്ള സാധ്യതയെ കുറിച്ച് ചോദിച്ചപ്പോൾ പരിശീലകൻ കൃത്യമായ ഉത്തരം നൽകിയിരുന്നില്ല. പിച്ചിന്റെ സാഹചര്യം പരിഗണിച്ച് മാത്രമേ നായകൻ കളിക്കുന്ന കാര്യത്തിൽ തീരുമാനം ഉണ്ടാകു എന്ന വിവരമാണ് ലഭിച്ചത്.
എന്നാൽ ഇന്ത്യൻ എക്‌സ്പ്രസിലെ ഒരു റിപ്പോർട്ട് അനുസരിച്ച് ഗംഭീറും രോഹിതും തമ്മിൽ പ്രശ്നങ്ങൾ ഉണ്ടെന്ന് പറയുന്നു. ക്യാപ്റ്റൻ സ്ഥാനം ബുംറയ്ക്ക് കൈമാറിയത് കൊണ്ട് ഇനി ടെസ്റ്റ് ടീമിൽ രോഹിത് കളിക്കാനുള്ള സാധ്യത കുറവാണ് എന്നാണ് ഇപ്പോൾ പുറത്ത് വരുന്ന റിപ്പോട്ടുകൾ സൂചിപ്പിക്കുന്നത്. വരും ദിവസങ്ങളിൽ രോഹിതിന്റെ വിരമിക്കൽ പ്രഖ്യാപനം ഉണ്ടായേക്കുമോ എന്നാണ് ആരാധകർ ചോദിക്കുന്നത്.
