ക്രിക്കറ്റ് ലോകത്തെ ഏറ്റവും മികച്ച ബാറ്റ്‌സ്മാനാണ് വിരാട് കോഹ്ലി. ഇന്ത്യൻ ക്രിക്കറ്റിന്റെ തലവര മാറ്റിയ ഇതിഹാസങ്ങളിൽ മുൻപന്തയിൽ നിൽക്കുന്ന താരമാണ് അദ്ദേഹം. പെർത്തിൽ നടന്ന ആദ്യ ടെസ്റ്റിൽ സെഞ്ച്വറി നേടിയെങ്കിലും പിന്നീട് ഉള്ള മത്സരങ്ങളിൽ ആ മികവ് കാട്ടാൻ താരത്തിന് സാധിച്ചില്ല. ഇപ്പോൾ അദ്ദേഹം മോശമായ സമയത്തിലൂടെയാണ് പോകുന്നത്.
വിരാട് കൊഹ്‌ലിയെ വാനോളം പുകഴ്ത്തി സംസാരിച്ചിരിക്കുകയാണ് വിരമിച്ച പാക്കിസ്ഥാൻ താരമായ പേസർ മുഹമ്മദ് ആമിർ. ബാബർ അസാമുമായി അദ്ദേഹത്തെ താരതമ്യം ചെയ്യരുതെന്നും, കോഹ്ലി ഈ തലമുറയിലെ ഏറ്റവും മികച്ച താരമാണെന്നു പറഞ്ഞിരിക്കുകയാണ് അദ്ദേഹം.
മുഹമ്മദ് ആമിർ പറയുന്നത് ഇങ്ങനെ:
“വിരാട് കോഹ്ലി ഈ തലമുറയിലെ ഏറ്റവും മികച്ച കളിക്കാരനാണ്. അദ്ദേഹത്തെ ബാബർ അസം, സ്റ്റീവ് സ്മിത്ത്, അല്ലെങ്കിൽ ജോ റൂട്ട് എന്നിവരുമായി താരതമ്യപ്പെടുത്തുമ്പോൾ ഞാൻ ചിരിക്കും. വിരാട് കോഹ്‌ലിയെ ആരുമായും താരതമ്യം ചെയ്യാൻ കഴിയില്ല, കാരണം വിരാട് കോഹ്ലി ഇന്ത്യയ്‌ക്കായി നിരവധി മത്സരങ്ങൾ ഒറ്റയ്ക്ക് നേടിയിട്ടുണ്ട്, അത് അസാധ്യമാണെന്ന് തോന്നുന്നു”
മുഹമ്മദ് ആമിർ തുടർന്നു:
“ഏതെങ്കിലും ഒരു കളിക്കാരനെ സംബന്ധിച്ചിടത്തോളം ഒരു ഫോർമാറ്റിൽ മാത്രമല്ല, മൂന്ന് ഫോർമാറ്റുകളിലും വിരാട് ഈ തലമുറയിലെ ഏറ്റവും മികച്ച ബാറ്റ്‌സ്മാനാണ്. വിരാട് കോഹ്‌ലിയുടെ കളിയോടുള്ള സമീപനവും കഠിനാധ്വാനവും സമ്മതിച്ചു കൊടുക്കേണ്ടതാണ്. 2014 ലെ ഇംഗ്ലണ്ടിലെ മോശം ഘട്ടത്തിന് ശേഷം വമ്പൻ തിരിച്ചുവരവ് നടത്തിയതും അടുത്ത പത്ത് വർഷം ഇന്ത്യൻ ക്രിക്കറ്റ് ടീമിൽ തന്റെ സ്ഥാനം ഉറപ്പിച്ചതും ചെറിയ കാര്യമല്ല” മുഹമ്മദ് ആമിർ പറഞ്ഞു.
