ജീവിച്ചിരിക്കുമ്പോൾ തന്നെ മരണവാർത്ത കേൾക്കേണ്ട അവസ്ഥ വിഷമിപ്പിക്കുന്നു, ആര് പ്രചരിപ്പിച്ച വാർത്ത ആണെങ്കിലും മാപ്പ് പറയണം: ഹീത്ത് സ്ട്രീക്ക്

By
സ്പോര്‍ട്സ് ഡെസ്ക്
|

സിംബാബ്വെ ഇതിഹാസം ഹീത്ത് സ്ട്രീക്കിന്റെ വിയോഗത്തെക്കുറിച്ചുള്ള തന്റെ സ്വന്തം വെളിപ്പെടുത്തൽ തിരുത്തി അദ്ദേഹത്തിന്റെ സഹതാരം ഹെന്റി ഒലോംഗ രംഗത്ത് എത്തിയിരുന്നു. ഹീത്ത് സ്ട്രീക്ക് മരിച്ചിട്ടില്ലെന്നും ജീവിച്ചിരിപ്പുണ്ടെന്നും ഒലോംഗ കുറച്ചുമസമായം മുമ്പ് അവകാശപ്പെട്ടു. നേരത്തെ സ്ട്രീക്ക് മരിച്ചുവെന്ന് പറഞ്ഞ് ഒലോംഗ തന്നെ ട്വീറ്റ് ചെയ്തിരുന്നു.

അർബുദ ബാധിതനായി ചികിത്സയിലിരിക്കെ താരം അന്തരിച്ചെന്നായിരുന്നു പുറത്തുവന്ന റിപ്പോർട്ടുകൾ. സിംബാബ്‌വെ ദേശീയ ടീമിന്റെ നായകനായിരുന്നു ഹീത്ത് സ്ട്രീക്ക്. രാവിലെ ആയിരുന്നു ഹീത്ത് സ്ട്രീക് മരിച്ചു എന്ന വാർത്ത സോഷ്യൽ മീഡിയയിൽ വന്നത്. അപ്പോൾ മുതൽ താരത്തിന് ആദരാഞ്ജലി അർപ്പിച്ചുകൊണ്ട് ആളുകൾ വന്നിരിക്കുന്നു.

ഹീത്ത് സ്ട്രീക്ക് വാർത്തയോട് പ്രതികരിച്ചത് ഇങ്ങനെ: “ഇതൊരു കിംവദന്തിയും നുണയുമാണ് – ഞാൻ ജീവിച്ചിരിപ്പുണ്ട്, സുഖമായിരിക്കുന്നു. ജീവിച്ചിരിക്കുമ്പോൾ തന്നെ മരണവാർത്ത പ്രചരിക്കുന്നത് എന്തൊരു മോശം അവസ്ഥയാണ്. ഉറവിടം ആരായാലും ക്ഷമാപണം നടത്തണമെന്ന് ഞാൻ വിശ്വസിക്കുന്നു, വാർത്ത എന്നെ വേദനിപ്പിച്ചു”.

സിംബാബ്‌വെയ്ക്കായി 65 ടെസ്റ്റ് മത്സരങ്ങളും 189 ഏകദിന മത്സരങ്ങളും കളിച്ചു. 4933 റൺസും 455 വിക്കറ്റുകളും സ്വന്തമാക്കി. രാജ്യാന്തര ക്രിക്കറ്റിൽ സിംബാബ്‌വെയ്ക്കായി കൂടുതൽ വിക്കറ്റ് നേടിയതിന്റെ റെക്കോർഡ് സ്ട്രീക്കിന്റെ പേരിലാണ്.