ഐസിസി ചാമ്പ്യന്‍സ് ട്രോഫിക്കുള്ള ഇന്ത്യന്‍ ക്രിക്കറ്റ് ടീമിനെ രോഹിത് ശര്‍മ്മ തന്നെ നയിക്കും. എന്നിരുന്നാലും, താരത്തിന്റെ ഭാവി അനിശ്ചിതത്വത്തിലാണ്. സമീപകാലത്ത് ടീമിന്റെ പ്രകടനം എല്ലാവരും പ്രതീക്ഷിച്ചതുപോലെ മുന്നോട്ടു പോയില്ല. ക്യാപ്റ്റനായും ബാറ്ററായും രോഹിത്തിന്റെ പ്രകടനം മികച്ചതായിരുന്നില്ല.
ബോര്‍ഡര്‍-ഗവാസ്‌കര്‍ ട്രോഫിയ്ക്കിടെ ഇന്ത്യന്‍ ക്യാപ്റ്റന്‍ സ്വയം ഒഴിവാക്കുന്ന ഘട്ടത്തിലേക്ക് കാര്യങ്ങള്‍ എത്തി. ഓസ്ട്രേലിയയ്ക്കെതിരായ ടെസ്റ്റ് തോല്‍വിക്ക് ശേഷം, ഇന്ത്യന്‍ ക്രിക്കറ്റിന്റെ ഭാവിയെക്കുറിച്ച് രോഹിത് ശര്‍മ്മ, ഗൗതം ഗംഭീര്‍, അജിത് അഗാര്‍ക്കര്‍ എന്നിവരുമായി ബിസിസിഐ ചര്‍ച്ച നടത്തിയിരുന്നു.
ഇതില്‍ ഒന്നുരണ്ടു കാര്യങ്ങള്‍ സ്ഥിരീകരിച്ചു. ഫലം മോശമായിട്ടും ഗൗതം ഗംഭീറും അദ്ദേഹത്തിന്റെ സപ്പോര്‍ട്ട് സ്റ്റാഫും തുടരും. വിരാട് കോഹ്‌ലിയും രോഹിത് ശര്‍മ്മയും ഐസിസി ചാമ്പ്യന്‍സ് ട്രോഫിക്കുള്ള ഇന്ത്യന്‍ ടീമിന്റെ ഭാഗമാകും. സീനിയര്‍ താരങ്ങള്‍ ഉള്‍പ്പെടെ ആഭ്യന്തര ക്രിക്കറ്റും കളിക്കണം. സൂര്യകുമാര്‍ യാദവാണ് ടി20 ക്യാപ്റ്റന്‍.
”ഇപ്പോള്‍, ഒന്നും സംഭവിക്കാന്‍ പോകുന്നില്ല. എന്നിരുന്നാലും, ക്യാപ്റ്റന്‍സിയുടെ മുന്നോട്ടുള്ള തീരുമാനത്തില്‍ മാനേജ്മെന്റ് തീരുമാനമെടുക്കുകയാണ്. ചാമ്പ്യന്‍സ് ട്രോഫിക്ക് ശേഷം, കാര്യങ്ങള്‍ മാറിയില്ലെങ്കില്‍, ക്യാപ്റ്റന്‍സിയുമായി ബന്ധപ്പെട്ട ചില ചടുല തീരുമാനങ്ങള്‍ നിങ്ങള്‍ കണ്ടേക്കാം, ”ഒരു ഉറവിടം സ്പോര്ട്സ് ടാക്കിനോട് പറഞ്ഞു.
വിരാട് കോലിയുടെയും രോഹിത് ശർമ്മയുടെയും ടെസ്റ്റ് കരിയറിനെ കുറിച്ച് ഇതുവരെ തീരുമാനമെടുത്തിട്ടില്ല. കോഹ്‌ലി ഫോമിലേക്ക് എത്തണമെന്നും നാട്ടിലും പുറത്തും നടക്കുന്ന മത്സരങ്ങളിൽ ടീം ഇന്ത്യയെ വിജയിപ്പിക്കണമെന്നും ബിസിസിഐ ആഗ്രഹിക്കുന്നു. എന്നിരുന്നാലും, അവരുടെ ടെസ്റ്റ് വിരമിക്കലിനെ സംബന്ധിച്ചിടത്തോളം, തീരുമാനമൊന്നും എടുത്തിട്ടില്ല. അവർ ഇരുവരും ഇംഗ്ലണ്ടിനെതിരായ ടെസ്റ്റിൽ കളിക്കും.
