ഐ.പി.എല്ലില്‍ സണ്‍റൈസേഴ്സ് ഹൈദരാബാദിനെതിരെ കിംഗ്സ് ഇലവന്‍ പഞ്ചാബിന് 69 റണ്‍സിന്റെ തോല്‍വി. ഹൈദരാബാദ് മുന്നോട്ടുവെച്ച 202 എന്ന വിജയലക്ഷ്യത്തിലേക്ക് ബാറ്റേന്തിയ പഞ്ചാബ് 16.5 ഓവറില്‍ 132 റണ്‍സിന് ഓള്‍ഔട്ടായി. 37 ബോളില്‍ 77 റണ്‍സെടുത്ത നിക്കോളാസ് പൂരനാണ് പഞ്ചാബിന്റെ ടോപ് സ്‌കോറര്‍. 7 സിക്‌സും 5 ഫോറും അടങ്ങുന്നതായിരുന്നു പൂരന്റെ ഇന്നിംഗ്‌സ്.
പൂരന്‍ മാത്രമാണ് പഞ്ചാബ് നിരയില്‍ തിളങ്ങിയത്. രാഹുല്‍ 11, മായങ്ക് അഗര്‍വാള്‍ 7, പ്രബ്‌സിമ്രന്‍ 11, മാക്‌സ്‌വെല്‍ 7, മന്ദീപ് സിംഗ് 6 എന്നിങ്ങനെയാണ് മറ്റുള്ളവരുടെ പ്രകടനം. പഞ്ചാബിനായി റാഷിദ് ഖാന്‍ നാലോവറില്‍ 12 റണ്‍സ് മാത്രം വഴങ്ങി 3 വിക്കറ്റ് വീഴ്ത്തി. ഖലീല്‍ അഹമ്മദ്, നടരാജന്‍ എന്നിവര്‍ രണ്ടു വിക്കറ്റ് വീതവും അഭിഷേക് ശര്‍മ്മ ഒരു വിക്കറ്റും വീഴ്ത്തി. പഞ്ചാബിന്റെ തുടര്‍ച്ചയായ നാലാം തോല്‍വിയാണിത്.
ദുബായ് രാജ്യാന്തര സ്റ്റേഡിയത്തില്‍ നടന്ന മത്സരത്തില്‍ ടോസ് നേടിയ ഹൈദരാബാദ് ബാറ്റിംഗ് തിരഞ്ഞെടുക്കുകയായിരുന്നു. ഡേവിഡ് വാര്‍ണര്‍- ജോണി ബെയര്സ്റ്റോ സഖ്യത്തിന്റെ 160 റണ്‍സിന്റെ ഓപ്പണിംഗ് കൂട്ടുകെട്ടാണ് ഹൈദരാബാദിന് മികച്ച സ്‌കോര്‍ സമ്മാനിച്ചത്. 55 ബോളില്‍ നിന്ന് 6 സിക്‌സിന്റെയും 7 ഫോറിന്റെയും അകമ്പടിയില്‍ ബെയര്സ്റ്റോ 97 റണ്‍സ് നേടി.
Read more
വാര്‍ണര്‍ 40 ബോളില്‍ 52 റണ്‍സെടുത്തു. ഒരു സിക്‌സും അഞ്ച് ഫോറുമടങ്ങുന്നതായിരുന്നു വാര്‍ണറുടെ പ്രകടനം. മനീഷ് പാണ്ഡെ 2 ബോളില്‍ 1, അബ്ദുള്‍ സമദ് 7 ബോളില്‍ 8, പ്രിയം ഗാര്‍ഗ് പൂജ്യം എന്നിവര്‍ നിരാശപ്പെടുത്തി. അഭിഷേക് ശര്‍മ്മ 6 ബോളില്‍ 12 റണ്‍സെടുത്തു. വില്യംസണ്‍ 10 ബോളില്‍ 20 റണ്‍സെടുത്ത് പുറത്താകാതെ നിന്നു. പഞ്ചാബിനായി രവി ബിഷ്‌ണോയി മൂന്ന് വിക്കറ്റ് വീഴ്ത്തി. അര്‍ഷ്ദീപ് സിംഗ് രണ്ട് വിക്കറ്റും ഷമി ഒരുവിക്കറ്റും വീഴ്ത്തി.
