ഐ ലീഗ് ഫുട്‌ബോളില്‍ ഗോകുലം കേരള എഫ്.സിയുടെ തുടക്കം തോല്‍വിയോടെ. ആദ്യകളിയില്‍ ഒന്നിനെതിരേ രണ്ടു ഗോളുകള്‍ക്ക് ചെന്നൈ സിറ്റിയാണ് ഗോകുലത്തെ തോല്‍പ്പിച്ചത്.
എല്‍വെദിന്‍ സ്‌ക്രിജെല്‍ (പെനാല്‍റ്റി 27), വിജയ് നാഗപ്പന്‍ (50) എന്നിവര്‍ ചെന്നൈയ്ക്കും ഡെന്നീസ് ആന്റ്വി (3) ഗോകുലത്തിനായും ഗോള്‍ നേടി. കളിയുടെ മൂന്നാം മിനിറ്റില്‍തന്നെ ഗോകുലം ലീഡെടുത്തിരുന്നു. കോര്‍ണര്‍ കിക്കില്‍ നിന്നായിരുന്നു ഗോള്‍ പിറന്നത്.
27ാം മിനിറ്റില്‍ പെനാല്‍റ്റി കിക്ക് വലയിലെത്തിച്ച് എല്‍വെദിന്‍ ചെന്നൈയുടെ സമനിലഗോള്‍ കണ്ടെത്തി. 50ാം മിനിറ്റില്‍ അവ്ഡിക്കിന്റെ പാസ്സില്‍ നിന്ന് വിജയ് നാഗപ്പന്‍ ലക്ഷ്യം കണ്ടതോടെ ചെന്നൈ മുന്നിലെത്തി. പിന്നീട് ഗോകുലം തുടര്‍ച്ചയായി ആക്രമണങ്ങള്‍ നടത്തിയെങ്കിലും ലക്ഷ്യം കാണാനായില്ല. 14നു പഞ്ചാബ് എഫ്.സിയുമായാണു ഗോകുലത്തിന്റെ അടുത്ത മത്സരം.
Read more
കോവിഡ് നിയന്ത്രണങ്ങള്‍ നിലനില്‍ക്കുന്നതിനാല്‍ കാണികളില്ലാതെയാണ് മത്സരങ്ങള്‍ നടക്കുന്നത്. പശ്ചിമ ബംഗാളിലെ നാല് മൈതാനങ്ങളിലായാണ് മത്സരങ്ങള്‍ നടക്കുന്നത്. സാള്‍ട്ട് ലേക്ക് സ്‌റേഡിയം, കല്യാണി സ്റ്റേഡിയം, മോഹന്‍ ബഗാന്‍ ഗ്രൗണ്ട്, കിഷോര്‍ ഭാരതി സ്റ്റേഡിയം എന്നിവിടങ്ങളിലായാണ് മത്സരങ്ങള്‍.
