സംഗീത സംവിധായകനായി അരങ്ങേറ്റത്തിനൊരുങ്ങി നടന്‍ അശോകന്‍. ബാബു തിരുവല്ല സംവിധാനം ചെയ്യുന്ന ‘മനസ്’ എന്ന ചിത്രത്തിനാണ് അശോകന്‍ സംഗീതം ഒരുക്കുന്നത്. സിനിമയില്‍ അഭിനയിക്കാനാണ് ആദ്യം ബാബു തിരുവല്ല വിളിക്കുന്നത്, പാട്ട് ചെയ്യാനുള്ള തന്റെ ആഗ്രഹം അങ്ങോട്ട് പറയുകയായിരുന്നു എന്നാണ് അശോകന്‍ പറയുന്നത്.
സംഗീതത്തോട് താല്‍പര്യമുണ്ടായിരുന്നെങ്കിലും സിനിമയില്‍ പാട്ടൊരുക്കുന്നതിനെ കുറിച്ച് ഗൗരവമായി ആലോചിച്ചിരുന്നില്ല. താല്‍പര്യത്തിന്റെ ഭാഗമായി കുറെ വര്‍ഷം മുമ്പ് കുറച്ച് ട്യൂണുകള്‍ തയ്യാറാക്കിയിരുന്നു. കൊവിഡ് സമയത്ത് ആ ട്യൂണുകള്‍ വീണ്ടും റെക്കോഡ് ചെയ്ത് പാട്ടാക്കി യൂട്യൂബില്‍ പോസ്റ്റ് ചെയ്തിരുന്നു.
പാട്ടൊരുക്കാനുള്ള അവസരം രണ്ടു തവണ ലഭിച്ചെങ്കിലും നിര്‍ഭാഗ്യവശാല്‍ ആ സിനിമകള്‍ മുടങ്ങിപ്പോയി. അതിന്റെ വിഷമത്തില്‍ നില്‍ക്കുമ്പോഴാണ് സംവിധായകന്‍ ബാബു തിരുവല്ല വിളിക്കുന്നത്. അഭിനയിക്കാനാണ് വിളിച്ചതെങ്കിലും പാട്ട് ചെയ്യാനുള്ള ആഗ്രഹം കൂടി അദ്ദേഹത്തോട് താന്‍ പറഞ്ഞു.
അദ്ദേഹത്തിന് താല്‍പര്യമായി. ഓഫ്ബീറ്റ് സിനിമയായതു കൊണ്ട് പാട്ട് ഉദ്ദേശിച്ചിട്ടില്ലെന്നായിരുന്നു മറുപടിയെങ്കിലും ഒരു സിറ്റുവേഷന്‍ സിനിമയിലുണ്ടെന്ന് പറഞ്ഞപ്പോള്‍ ആശ്വാസമായി. താന്‍ സംഭവിച്ചതെല്ലാം പറഞ്ഞപ്പോള്‍ ബാബു പാട്ട് ഉള്‍പ്പെടുത്താമെന്ന തീരുമാനത്തിലെത്തി.
Read more
ശോകഭാവത്തിലുള്ള പാട്ടാണ്. തമ്പിസാറിന്റെ മനോഹരമായ വരികളും പി. ജയചന്ദ്രന്റെ ശബ്ദവുമാണ് പാട്ടിന്റെ പ്രധാന ഹൈലൈറ്റ്. ഏറെ ആസ്വദിച്ച് പാട്ട് ചെയ്യാന്‍ കഴിഞ്ഞതിന്റെ സന്തോഷമുണ്ട്. പ്രേക്ഷകരുടെ പ്രതികരണങ്ങളും പോസിറ്റീവ് ആകുമെന്നാണ് വിശ്വാസം എന്നാണ് അശോകന്‍ പറയുന്നത്.
