മാധ്യമപ്രവര്‍ത്തകരും നടന്‍ ജീവയും തമ്മില്‍ വാക്കേറ്റം. നടി രാധിക ശരത്കുമാറിന്റെ വെളിപ്പെടുത്തലിനെ കുറിച്ചുള്ള ചോദ്യങ്ങളിലാണ് ജീവ ക്ഷുഭിതനായത്. തമിഴ് സിനിമയില്‍ ഒരു പ്രശ്‌നവുമില്ലെന്നാണ് ജീവ പറയുന്നത്. പ്രശ്‌നങ്ങള്‍ മലയാള സിനിമയില്‍ മാത്രമാണ്. ചോദ്യം ആവര്‍ത്തിച്ചതോടെ ജീവ ക്ഷുഭിതനാവുകയായിരുന്നു.
അതേസമയം, മലയാള സിനിമാ ചിത്രീകരണ സ്ഥലങ്ങളിലെ കാരവനുകളില്‍ ഒളിക്യാമറ വച്ച് നടിമാരുടെ നഗ്നദൃശ്യങ്ങള്‍ പകര്‍ത്തുന്നുണ്ടെന്നും സെറ്റില്‍ പുരുഷന്മാര്‍ ഒന്നിച്ചിരുന്നു മൊബൈലില്‍ ഈ ദൃശ്യങ്ങള്‍ കാണുന്നത് താന്‍ നേരിട്ടു കണ്ടിട്ടുണ്ടെന്നുമാണ് രാധിക വെളിപ്പെടുത്തിയത്.
എന്നാല്‍ ഈ വിഷയത്തില്‍ കേസ് നല്‍കാനില്ല എന്നാണ് രാധികയുടെ നിലപാട്. വെളിപ്പെടുത്തല്‍ പുറത്തുവന്നതിന് പിന്നാലെ പ്രത്യേക അന്വേഷണസംഘം രാധിക ശരത്കുമാറിനോട് സംസാരിച്ചെങ്കിലും അവര്‍ മൊഴികൊടുക്കാനോ കേസുമായി മുന്നോട്ടു പോകാനോ തയാറല്ല എന്ന് അറിയിക്കുകയായിരുന്നു.
ഭയം കാരണം പിന്നീടു ലൊക്കേഷനിലെ കാരവന്‍ ഉപയോഗിച്ചിട്ടില്ല. തനിക്കറിയാവുന്നവരോട് ഇതു സംബന്ധിച്ച് മുന്നറിയിപ്പ് നല്‍കിയെന്നും രാധിക പറഞ്ഞു. എന്നാല്‍ ഏത് സിനിമയുടെ ലൊക്കേഷനാണെന്ന് പറയാന്‍ താന്‍ ആഗ്രഹിക്കുന്നില്ല എന്നാണ് രാധിക പറയുന്നത്.
