നടി മേഘ്‌ന രാജുമായി അടുത്ത സൗഹൃദമുള്ള താരമാണ് നസ്രിയ. മേഘ്‌നയുമായുള്ള സൗഹൃദത്തെ കുറിച്ച് നസ്രിയ പറഞ്ഞ വാക്കുകളാണ് ഇപ്പോള്‍ ശ്രദ്ധ നേടുന്നത്. മേഘ്‌നയുമായുള്ള ബന്ധം സൗഹൃദം എന്ന് പറയാനാവില്ല, തന്റെ ചോര തന്നെയാണ് എന്നാണ് വിശ്വാസം. തന്നെ മകളെ പോലെയാണ് മേഘ്‌നയ്ക്ക് എന്നാണ് നസ്രിയ പറയുന്നത്.
വനിത മാഗസിന് നല്‍കിയ അഭിമുഖത്തിലാണ് നസ്രിയ സംസാരിച്ചത്. അത് സൗഹൃദം എന്ന് പറയാനാവില്ല. എന്റെ ചോര തന്നെയെന്നാണ് വിശ്വാസം. അമ്മയെന്നോ ചേച്ചിയെന്നോ പറയാം. ദിയ എന്നാണ് വിളിക്കാറുള്ളത്. ഞാന്‍ ചെറിയ റോളില്‍ അഭിനയിച്ചു കൊണ്ടിരിക്കുമ്പോഴാണ് പരിചയപ്പെടുന്നത്. ദിയ അന്ന് വലിയ നടിയാണ്. താരമാണ്.
ഒന്നുമല്ലാതിരുന്ന കാലത്ത് എനിക്ക് കിട്ടിയ ആ സ്‌നേഹവും പ്രയോറിറ്റിയും തന്ന പോസിറ്റീവ് എനര്‍ജി വലുതായിരുന്നു. ദിയക്ക് മകന്‍ ജനിക്കും മുമ്പ് ഉണ്ടായ മകളാണ് ഞാന്‍ എന്നാണ് വിശ്വാസം. അതുകൊണ്ട് തന്നെ എന്തെങ്കിലും ചെറിയ കുരുത്തക്കേടൊക്കെ പോയി പറയാന്‍ പേടി ഇന്നുമുണ്ട് എന്നാണ് നസ്രിയ പറയുന്നത്.
2013ല്‍ പുറത്തിറങ്ങിയ മാഡ് ഡാഡ് എന്ന ചിത്രത്തിലാണ് നസ്രിയയും മേഘ്‌നയും ഒരുമിച്ച് അഭിനയിച്ചത്. അന്ന് മുതലുള്ള സൗഹൃദമാണ് ഇരുവരുടേതും. അപ്രതീക്ഷിതമായി ചിരഞ്ജീവി സാര്‍ജെയുടെ വിയോഗം ഉണ്ടായപ്പോള്‍ മേഘ്‌നയ്ക്ക് ധൈര്യം പകര്‍ന്നു കൂടെ നിന്ന സുഹൃത്തുക്കള്‍ ആയിരുന്നു നസ്രിയയും അനന്യയും.
ചിരഞ്ജീവി മരിക്കുന്ന സമയത്ത് മേഘ്‌ന ഗര്‍ഭിണി ആയിരുന്നു. ഏതാനും മാസങ്ങള്‍ക്ക് ശേഷം മേഘ്‌ന കുഞ്ഞിന് ജന്മം നല്‍കുകയും ചെയ്തു. കുഞ്ഞ് റയാന്‍ ഉണ്ടായ സമയത്ത് മേഘ്‌നയെയും കുഞ്ഞിനെയും കാണാന്‍ നസ്രിയയും ഫഹദും ബംഗളൂരുവില്‍ എത്തിയിരുന്നു.
