ഏറെ കാലമായി ലിവിംഗ് ടുഗദെറിലായിരുന്ന സായ് കുമാറും ബിന്ദു പണിക്കറും ആറ് വര്‍ഷങ്ങള്‍ക്ക് മുമ്പാണ് വിവാഹിതരായത്. മകള്‍ കല്യാണിക്കൊപ്പമാണ് ഇരുവരും താമസിക്കുന്നത്. ഇരുവരും ഒന്നിച്ച് നല്‍കിയ അഭിമുഖമാണ് ഇപ്പോള്‍ വൈറലായി കൊണ്ടിരിക്കുന്നത്.
നിങ്ങളെ കുറിച്ച് കേട്ട, ഏറ്റവും ചിരിച്ച ഗോസിപ്പ് ഏതെന്ന ചോദ്യത്തിന് സായ് കുമാറും ബിന്ദു പണിക്കരും നല്‍കിയ മറുപടിയാണ് ശ്രദ്ധ നേടിക്കൊണ്ടിരിക്കുന്നത്. തങ്ങള്‍ വേര്‍പിരിഞ്ഞു എന്ന വാര്‍ത്ത കേട്ടാണ് ഒരുപാട് ചിരിച്ചത് എന്നാണ് ഇരുവരും പറയുന്നത്. ഇക്കാര്യം മകളാണ് തങ്ങളോട് ആദ്യം പറഞ്ഞതെന്നും സായ് കുമാര്‍ പറയുന്നുണ്ട്.
”ഒരു ദിവസം ഞങ്ങള്‍ ബെഡ്‌റൂമിലിരുന്ന് സിനിമ കണ്ടുകൊണ്ടിരിക്കുകയാണ്. ക്ലൈമാക്‌സിനോട് അടുത്തു കൊണ്ടിരിക്കുമ്പോള്‍ മോള് വാതില്‍ തുറന്നിട്ട്, ‘ഗയ്‌സ് നിങ്ങളറിഞ്ഞോ?’ എന്നു ചോദിച്ചു. എന്താ കാര്യം എന്നു തിരക്കിയപ്പോള്‍ ‘നിങ്ങള് പിരിഞ്ഞൂട്ടോ’ എന്നു പറഞ്ഞു.”
”നോക്കിയപ്പോള്‍ സോഷ്യല്‍ മീഡിയയില്‍ എല്ലായിടത്തും ഈ ന്യൂസ് വന്നു കൊണ്ടിരിക്കുകയാണ്. പിറ്റേദിവസം മുതല്‍ കോളുകളുടെ വരവായി. ചേട്ടന്‍ എവിടെയാ?, ഞാന്‍ വീട്ടിലുണ്ടെന്നു പറയുമ്പോള്‍ വെറുതെ വിളിച്ചതാ, ഒത്തിരി നാളായല്ലോ വിളിച്ചിട്ട് എന്നൊക്കെ പറഞ്ഞു ഫോണ്‍ വയ്ക്കും.”
”എന്തിനാണ് ആളുകളൊക്കെ വിളിക്കുന്നതെന്ന് മനസിലായി. മറ്റൊരു ചങ്ങാതി വിളിച്ച് ഇതുപോലെ എവിടെയാ? എന്നൊക്കെ കുശലാന്വേഷണം. നീ ചോദിക്കാന്‍ വന്നയാള് അടുക്കളയില്‍ കൊഞ്ചു തീയല്‍ ഉണ്ടാക്കി കൊണ്ടിരിക്കുകയാണ്, ഞാനവള്‍ക്ക് ഫോണ്‍ കൊടുക്കാം എന്നു പറഞ്ഞു ബിന്ദുവിനു ഫോണ്‍ കൈമാറി.”
Read more
”അതല്ല ചേട്ടാ, എല്ലാവരും ഇങ്ങനെ പറയുന്നതു കേട്ടപ്പോള്‍ എനിക്കുമൊരു ഡൗട്ടായി അതാ വിളിച്ചത് എന്നായിരുന്നു ആ ചങ്ങാതിയുടെ മറുപടി” എന്നാണ് സായ് കുമാര്‍ പറയുന്നത്. അതേസമയം, ‘അനക്ക് എന്തിന്റെ കേടാ’ എന്ന ചിത്രത്തില്‍ ഇരുവരും ഒന്നിച്ച് അഭിനയിക്കുകയാണ് ഇപ്പോള്‍. ഓഗസ്റ്റ് 4ന് ചിത്രം തിയേറ്ററിലെത്തും.
