ദിലീപ് ചിത്രം ‘ക്രേസി ഗോപാലന്‍’ കഴിഞ്ഞ ദിവസങ്ങളില്‍ സോഷ്യല്‍ മീഡിയ ചര്‍ച്ചകളില്‍ ഇടം നേടിയിരുന്നു. ക്രേസി ഗോപാലനില്‍ ആദ്യം സാമന്തയെ ആയിരുന്നു നായികയായി തീരുമാനിച്ചിരുന്നത്, എന്നാല്‍ ഉയരക്കുറവ് കാരണം മാറ്റുകയായിരുന്നു എന്ന് ചിത്രത്തിന്റെ ദീപു കരുണാകരന്‍ ഒരു അഭിമുഖത്തില്‍ പറഞ്ഞിരുന്നു.

സംവിധായകന്റെ വാക്കുകള്‍ സോഷ്യല്‍ മീഡിയയില്‍ ചര്‍ച്ചയാവുകയായിരുന്നു. ഈ വിഷയത്തില്‍ പ്രതികരിച്ചിരിക്കുകയാണ് സാമന്ത ഇപ്പോള്‍. ‘ശാകുന്തളം’ എന്ന പുതിയ ചിത്രത്തിന്റെ കൊച്ചിയില്‍ പ്രസ് മീറ്റിലാണ് സാമന്ത സംസാരിച്ചത്.

‘അന്ന് ദിലീപ് ചിത്രത്തിന്റെ സ്‌ക്രീന്‍ ടെസ്റ്റില്‍ നിന്നും ഒഴിവാക്കപ്പെട്ടിട്ടുണ്ട്, ഇന്ന് ശാകുന്തളത്തിന്റെ പ്രൊമോഷനായി കേരളത്തില്‍ എത്തിനില്‍ക്കുന്നു, പിറകിലേക്ക് തിരിഞ്ഞ് നോക്കുമ്പോള്‍ എന്ത് തോന്നുന്നു’ എന്നായിരുന്നു സാമന്തയോട് ഒരു മാധ്യമപ്രവര്‍ത്തകന്‍ ചോദിച്ചത്.

”ഒരുപാട് ഓഡിഷനുകളില്‍ നിന്നും റിജക്ട് ചെയ്യപ്പെട്ടിട്ടുണ്ട്. എന്നാല്‍ അതൊക്കെ മറന്നുപോയി. കരിയറിന്റെ തുടക്കത്തില്‍ റിജക്ട് ചെയപ്പെട്ടിട്ടുണ്ട് എന്നത് ഓര്‍ക്കുന്നുണ്ട്. ഇതുവരെയുള്ള യാത്രയില്‍ എനിക്ക് ഫുള്‍ ക്രെഡിറ്റ് എടുക്കാനാവില്ല.”

”ഇന്‍ഡസ്ട്രിയിലെ ഏറ്റവും മികച്ച ആളുകളുമൊത്ത് വര്‍ക്ക് ചെയ്യാന്‍ സാധിച്ചു. എന്റെ വിജയം അവര്‍ക്കൊപ്പം പങ്കുവയ്ക്കാന്‍ ആഗ്രഹിക്കുന്നു. എന്റെ കരിയറില്‍ പല സമയത്ത് ഒരു സ്റ്റെപ്പ് കൂടുതല്‍ മുന്നോട്ട് വെക്കാന്‍ സഹായിച്ചത് അവരാണ്” എന്നാണ് സാമന്ത പറഞ്ഞത്.