നടനും രാഷ്ട്രീയ നേതാവുമായ ശരത്കുമാറിനെതിരെ പരാതിയുമായി നടന്‍ ധനുഷിന്റെ അമ്മ വിജയലക്ഷ്മി. ചെന്നൈ ത്യാഗരാജ നഗറിലെ രാജമന്നാര്‍ സ്ട്രീറ്റിലെ അപ്പാര്‍ട്ടുമെന്റിലാണ് ധനുഷിന്റെ അമ്മ വിജയലക്ഷ്മിയും അച്ഛന്‍ കസ്തൂരി രാജയും താമസിക്കുന്നത്.
ഈ അപ്പാര്‍ട്ട്‌മെന്റിലെ എല്ലാ താമസക്കാര്‍ക്കും പൊതുവായി ഉപയോഗിക്കാവുന്ന മുകളിലത്തെ നില ശരത്കുമാര്‍ കൈവശപ്പെടുത്തി വാണിജ്യാടിസ്ഥാനത്തില്‍ ഉപയോഗിക്കുന്നു എന്നാണ് വിജയലക്ഷ്മിയും മറ്റ് താമസക്കാരും നല്‍കിയ പരാതിയില്‍ പറയുന്നത്. മദ്രാസ് ഹൈക്കോടതിയിലാണ് പരാതി നല്‍കിയിരിക്കുന്നത്.
ജസ്റ്റിസുമാരായ എസ്.എസ്.സുന്ദര്‍, എന്‍.സെന്തില്‍കുമാര്‍ എന്നിവരടങ്ങിയ ബെഞ്ചാണ് കേസ് പരിഗണിച്ചത്. താമസസ്ഥലത്തെ പൊതുസ്ഥലങ്ങള്‍ മറ്റുതാമസക്കാര്‍ കയ്യേറി ഉപയോഗിക്കുന്നത് തടയണമെന്ന് ആവശ്യപ്പെട്ട് കോര്‍പ്പറേഷന്‍ അധികൃതര്‍ക്ക് പരാതി നല്‍കിയിട്ടും നടപടിയുണ്ടായില്ല എന്നും ഹര്‍ജിയില്‍ പറയുന്നുണ്ട്.
ചെന്നൈ കോര്‍പ്പറേഷന്‍ അധികൃതരോടും നടന്‍ ശരത്കുമാറിനോടും അവരുടെ ഭാഗം വ്യക്തമാക്കാന്‍ ഉത്തരവിട്ട കോടതി, വാദം കേള്‍ക്കുന്നത് നാലാഴ്ചത്തേക്ക് മാറ്റിവച്ചു. സിനിമയിലും രാഷ്ട്രീയത്തിലും സജീവമായ ശരത്കുമാര്‍ ഓള്‍ ഇന്ത്യ ഈക്വല്‍ പീപ്പിള്‍സ് പാര്‍ട്ടിയുടെ പ്രസിഡന്റാണ്.
