ധനുഷ് ചിത്രം ‘രായന്‍’ ഇനി ഒ.ടി.ടിയിലേക്ക്. ധനുഷിന്റെ സംവിധാനത്തില്‍ താരം തന്നെ നായകനായി എത്തിയ ചിത്രമാണ് രായന്‍. ആമസോണ്‍ പ്രൈമിലൂടെയാണ് ചിത്രം സ്ട്രീമിങ് ആരംഭിക്കുന്നത്. ഓഗസ്റ്റ് 23 മുതല്‍ ചിത്രം സ്ട്രീമിങ് ആരംഭിക്കും. മലയാളം, തമിഴ്, തെലുങ്ക്, ഹിന്ദി തുടങ്ങിയ വിവിധ ഭാഷകളില്‍ ചിത്രം ലഭ്യമാകും.
ജൂലൈ 26ന് റിലീസ് ചെയ്ത ചിത്രം ബോക്‌സ് ഓഫീസില്‍ 150 കോടിയോളം രൂപ കളക്ഷന്‍ നേടിയിട്ടുണ്ട്. സണ്‍ പിക്‌ച്ചേഴ്സിന്റെ ബാനറില്‍ കലാനിധി മാരന്‍ നിര്‍മ്മിച്ച ചിത്രത്തില്‍ മലയാളി താരം അപര്‍ണ ബാലമുരളിയാണ് നായികയായെത്തിയത്. തമിഴ്, തെലുങ്ക്, ഹിന്ദി ഭാഷകളിലാണ് ചിത്രം തിയേറ്ററിലെത്തിയത്.
ചിത്രത്തില്‍ മറ്റൊരു പ്രധാന വേഷത്തിലെത്തിയ എസ്‌ജെ സൂര്യ ഉള്‍പ്പെടെയുള്ള താരങ്ങളും ശ്രദ്ധ നേടിയിരുന്നു. എ.ആര്‍ റഹ്‌മാനാണ് ചിത്രത്തിന്റെ സംഗീതം ഒരുക്കിയിരിക്കുന്നത്. പീറ്റര്‍ ഹെയിനാണ് ചിത്രത്തിലെ ഗംഭീര സംഘട്ടന രംഗങ്ങള്‍ക്ക് പിന്നില്‍.
നിത്യ മേനോന്‍, കാളിദാസ് ജയറാം, സുന്ദീപ് കിഷന്‍, വരലക്ഷ്മി ശരത്കുമാര്‍, ദുഷാര വിജയന്‍, പ്രകാശ് രാജ്, സെല്‍വരാഘവന്‍ എന്നിവരാണ് ചിത്രത്തിലെ മറ്റ് പ്രധാന താരങ്ങള്‍. ഓം പ്രകാശ് ഛായാഗ്രഹണം നിര്‍വഹിക്കുന്ന ചിത്രത്തിന്റെ എഡിറ്റിംഗ് നിര്‍വഹിച്ചത് ജി.കെ പ്രസന്നയാണ്.
അതേസമയം, ധനുഷിന്റെ കരിയറിലെ അന്‍പതാം സിനിമ കൂടിയാണ് രായന്‍. സിനിമയ്ക്ക് മറ്റൊരു അംഗീകാരം കൂടി ലഭിച്ചിരുന്നു. അക്കാദമി ഓഫ് മോഷന്‍ പിക്‌ചേഴ്‌സ് ആര്‍ട്‌സ് ആന്റ് സയന്‍സസിന്റെ ലൈബ്രറിയിലേക്ക് ചിത്രത്തിന്റെ തിരക്കഥ തിരഞ്ഞെടുക്കപ്പെട്ടിരുന്നു.
