‘ദൃശ്യം 3’ വരുന്നുവെന്ന വാര്‍ത്ത നിഷേധിച്ച് സംവിധായകന്‍ ജീത്തു ജോസഫ്. കഴിഞ്ഞ ദിവസം മുതല്‍ ദൃശ്യം 3 സോഷ്യല്‍ മീഡിയയില്‍ ട്രെന്‍ഡിങ് ആയിരുന്നു. ചിത്രത്തിന്റെ സ്‌ക്രിപ്റ്റ് വര്‍ക്കുകള്‍ പൂര്‍ത്തിയായെന്നും 2025 അവസാനത്തോടെ ചിത്രം തിയേറ്ററുകളില്‍ എത്തും എന്നുള്ള റിപ്പോര്‍ട്ടുകള്‍ ആയിരുന്നു എക്‌സ് അടക്കമുള്ള പ്ലാറ്റ്‌ഫോമുകളില്‍ പ്രചരിച്ചത്.
എന്നാല്‍ ഇത് താന്‍ അറിഞ്ഞിട്ടില്ല എന്നാണ് ജീത്തു ജോസഫ് വ്യക്തമാക്കിയിരിക്കുന്നത്. സിനിമയുടെ തിരക്കഥ പൂര്‍ത്തിയായെന്ന വാര്‍ത്തയും തെറ്റാണെന്ന് സംവിധായകന്‍ മാധ്യമങ്ങളോട് വ്യക്തമാക്കി. ‘ആ ക്ലാസിക് ക്രിമിനല്‍ തിരിച്ചു വരുന്നു’ എന്ന ഹാഷ്ടാഗോടെ എത്തിയ പോസ്റ്റുകള്‍ മോഹന്‍ലാല്‍ ആരാധകരും ഏറ്റെടുത്തിരുന്നു.
ജീത്തു ജോസഫ് തന്നെ ഈ വാര്‍ത്ത നിഷേധിച്ചതോടെ ദൃശ്യം 3യ്ക്ക് വേണ്ടി ഇനിയും കാത്തിരിക്കേണ്ടി വരും. മലയാളത്തിലെ ആദ്യ 50 കോടി ചിത്രമായിരുന്നു ദൃശ്യം. മൊത്തം 75 കോടിയായിരുന്നു ആദ്യ ഭാഗം തിയേറ്ററില്‍ നിന്നും നേടിയത്. ചൈനീസില്‍ അടക്കം ആറ് ബാഷകളിലേക്ക് ചിത്രം റീമേക്ക് ചെയ്യപ്പെട്ടിട്ടുണ്ട്.
മോഹന്‍ലാലിനൊപ്പം മീന, അന്‍സിബ ഹസന്‍, ആശാ ശരത്, സിദ്ദിഖ്, എസ്തര്‍ അനില്‍ തുടങ്ങിയവരായിരുന്നു ചിത്രത്തിലെ പ്രധാന അഭിനേതാക്കള്‍. 2021 ഫെബ്രുവരി 19 നാണ് ദൃശ്യം രണ്ടാം ഭാഗം പുറത്തിറങ്ങിയത്. ആമസോണ്‍ പ്രൈമില്‍ ആയിരുന്നു സ്ട്രീം ചെയ്തത്.
