ചിത്രങ്ങളുടെ പുതിയ പുതിയ ലുക്കുകള്‍ പുറത്തു വരുമ്പോഴും ആരാധകരെ ഞെട്ടിക്കുകയാണ് മമ്മൂട്ടി. പ്രായത്തെ തോല്‍പ്പിക്കുന്ന കലക്കന്‍ ലുക്ക് തന്നെ കാരണം. റിലീസിന് ഒരുങ്ങുന്ന പുതിയ ചിത്രം ഗാനഗന്ധര്‍വ്വനിലെ മമ്മൂട്ടിയുടെ ലുക്കും ആരാധകരെ ഏറെ ആവേശത്തിലാക്കിയിരിക്കുകയാണ്. ചിത്രത്തിലെ നായിക അതുല്യ ചന്ദ്രയുമൊന്നിച്ചുള്ള മമ്മൂട്ടിയുടെ ചിത്രം രമേശ് പിഷാരടി സോഷ്യല്‍ മീഡിയയിലൂടെ പങ്കുവെച്ചിരുന്നു. ഇത് ഇതിനോടകം സോഷ്യല്‍ മീഡിയയില്‍ വൈറലായിട്ടുണ്ട്.
ചിത്രവുമായി ബന്ധപ്പെട്ട് ഒരു സര്‍പ്രൈസ് ഇന്നെത്തുന്ന കാര്യവും പിഷാരടി ചിത്രം പങ്കുവെച്ച് കുറിച്ചിട്ടുണ്ട്. പഞ്ചവര്‍ണ്ണ തത്തയ്ക്ക് ശേഷം രമേശ് പിഷാരടി സംവിധാനം ചെയ്യുന്ന ചിത്രമാണ് “ഗാനഗന്ധര്‍വ്വന്‍”. ഗാനമേളകളില്‍ പാടുന്ന കലാസദന്‍ ഉല്ലാസ് എന്ന കഥാപാത്രത്തെയാണ് മമ്മുട്ടി ചിത്രത്തില്‍ അവതരിപ്പിക്കുക.
Read more
രമേശ് പിഷാരടിയും ഹരി പി നായരും ചേര്‍ന്നാണ് ചിത്രത്തിന്റെ രചന നിര്‍വഹിച്ചിരിക്കുന്നത്. മുകേഷ് , ഇന്നസെന്റ്, സിദ്ധിഖ്, സലിം കുമാര്‍, ധര്‍മജന്‍ ബോള്‍ഗാട്ടി, ഹരീഷ് കണാരന്‍, മനോജ് കെ ജയന്‍, സുരേഷ് കൃഷ്ണ, മണിയന്‍ പിള്ള രാജു, കുഞ്ചന്‍, അശോകന്‍, സുനില്‍ സുഖദ, അതുല്യ, ശാന്തി പ്രിയ തുടങ്ങി വന്‍താരനിരയാണ് ചിത്രത്തിലുള്ളത്. ശ്രീലക്ഷ്മി ആര്‍, ശങ്കര്‍ രാജ് ആര്‍, രമേഷ് പിഷാരടി എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്. അഴകപ്പന്‍ ഛായാഗ്രഹണം നിര്‍വഹിക്കുന്ന ചിത്രത്തിന് സംഗീതമൊരുക്കുന്നത് ദീപക് ദേവാണ്.
