ഗ്ലാമര്‍ ലോകത്തോട് വിട പറഞ്ഞ് ആത്മീയതയിലേക്ക് തിരിഞ്ഞ താരമാണ് സന ഖാന്‍. മൂന്ന് വര്‍ഷങ്ങള്‍ക്ക് മുമ്പാണ് പണ്ഡിതനായ അനസ് സയിദിനെ താരം വിവാഹം ചെയ്തത്. തന്റെ ഓരോ വിശേഷങ്ങളും സോഷ്യല്‍ മീഡിയയില്‍ പങ്കുവയ്ക്കുന്ന സനയ്ക്ക് ഇപ്പോഴും ആരാധകരുണ്ട്.
കഴിഞ്ഞ ജൂലൈയിലാണ് തനിക്കൊരു കുഞ്ഞ് ജനിച്ച വിവരം സന പങ്കുവച്ചത്. നിരവധി പേരാണ് ഭര്‍ത്താവ് മുഫ്തി അനസ് സയ്യിദിനും സനയ്ക്കും ആശംസ അറിയിച്ച് രംഗത്തെത്തിയത്. നിലവില്‍ കുഞ്ഞിന്റെ വിശേഷങ്ങളാണ് സന സോഷ്യല്‍ മീഡിയയില്‍ പങ്കുവയ്ക്കുന്നതും.
ലോക മുലയൂട്ടല്‍ വാരത്തോട് അനുബന്ധിച്ച് സന പറഞ്ഞ കാര്യങ്ങളാണ് ഇപ്പോള്‍ ശ്രദ്ധ നേടുന്നത്. മൂലയൂട്ടാന്‍ തുടങ്ങിയതിന് ശേഷം തന്റെ ശരീരത്തില്‍ സംഭവിച്ച മാറ്റങ്ങളെ കുറിച്ചാണ് സന ഇപ്പോള്‍ പറയുന്നത്. ”പ്രസവ ശേഷം ശരീരഭാരം കുറയ്ക്കുക, പഴയ രൂപത്തിലേക്ക് പോകണം തുടങ്ങിയ ചിന്തയൊന്നും എനിക്ക് ഉണ്ടായിരുന്നില്ല.”
”പക്ഷെ ഒരു മാസത്തിനുള്ളില്‍ ഏകദേശം 15 കിലോ കുറയ്ക്കാന്‍ മുലയൂട്ടലിലൂടെ സാധിച്ചു. ഞാന്‍ തന്നെ ആശ്ചര്യപ്പെട്ടു പോയി. മുലയൂട്ടല്‍ ശരീരഭാരം കുറയ്ക്കുമെന്ന് ശാസ്ത്രീയമായി തെളിയിക്കപ്പെട്ടിട്ടുണ്ട്” എന്നാണ് സന ഹിന്ദുസ്ഥാന്‍ ടൈംസിന് നല്‍കിയ അഭിമുഖത്തില്‍ പറയുന്നത്.
Read more
”പൊതുസ്ഥലങ്ങളില്‍ വച്ച് കുഞ്ഞിനെ മുലയൂട്ടുന്നത് എനിക്ക് എളുപ്പമുള്ള കാര്യം അല്ല. ചിലര്‍ക്ക് അതിന് സാധിക്കുമായിരിക്കും. പക്ഷേ എനിക്കത് സുഖകരമായ കാര്യമല്ല. പുറത്ത് ജോലിക്കും മറ്റും പോകുമ്പോള്‍ കുഞ്ഞിന് പാല് കൊടുക്കുന്നത് എങ്ങനെ എന്നാണ് ഇപ്പോഴത്തെ എന്റെ ആശങ്ക” എന്നാണ് സന പറയുന്നത്.
