മലയാള സിനിമയിലെ ഏറ്റവും സ്റ്റൈലിഷ് ചിത്രങ്ങളുടെ ലിസ്റ്റിൽ മുൻപന്തിയിൽ നിൽക്കുന്ന സിനിമയാണ് മമ്മൂട്ടിയെ നായകനാക്കി അമൽ നീരദ് സംവിധാനം ചെയ്ത ബിഗ് ബി. ചിത്രത്തിലെ ഓരോ രംഗങ്ങളും സംഭാഷണങ്ങളും ഇന്നും മലയാളികൾ ആഘോഷമാക്കാറുണ്ട്.
അത്തരത്തിൽ ഏറ്റവും ചർച്ചയായ ചിത്രത്തിലെ രംഗങ്ങളിലൊന്നാണ് കാർ ബ്ലാസ്റ്റ് സീൻ. വണ്ടി കത്തിക്കുന്നതിനിടയിൽ മമ്മൂട്ടിക്ക് നേരെ വണ്ടിയിൽ നിന്നും ഒരു ഭാഗം തെറിച്ച് വീഴുന്നതായി കാണാൻ കഴിയും. പിന്നീട് കാറിന്റെ ഡോറാണ് തെറിച്ചു വന്നതെന്നും മമ്മൂട്ടി മാറിയില്ലായിരുന്നെങ്കിൽ വലിയ രീതിയിലുള്ള അപകടം അവിടെ സംഭവിച്ചേനെ എന്നുമായിരുന്നു അന്ന് ചർച്ചകളിൽ ഏറ്റവും കൂടുതൽ ഉയർന്നുകേട്ടിരുന്നത്.
എന്നാൽ ഇപ്പോഴിതാ അതിന്റെ സത്യാവസ്ഥ പുറത്തുവന്നിരിക്കുകയാണ്. ഡോറിന്റെ ഭാഗമല്ല, കാറിന്റെ ഉള്ളിലുണ്ടായിരുന്ന ഡമ്മിയുടെ ഭാഗമാണ് തെറിച്ച് വന്നത് എന്നാണ് സിനിമയുടെ കലാ സംവിധായകൻ ജോസഫ് നെല്ലിക്കൽ ഒരു അഭിമുഖത്തിൽ പറഞ്ഞത്.
“കുണ്ടന്നൂർ പാലത്തിന് സമീപമായിരുന്നു ഷൂട്ടിങ്ങ് നടന്നത്. ആദ്യം ജീപ്പിലെ സീൻ എടുത്തു, അതിന് ശേഷമാണ് വണ്ടി കത്തിക്കുന്ന സീൻ. ഇതിൽ ഡമ്മി വെച്ചിട്ടുണ്ടായിരുന്നു. വണ്ടി കത്തിയപ്പോൾ ഡമ്മിയുടെ ഒരു പീസ് തെറിച്ചു വന്നു. ഇതൊക്കെ വെളിപ്പെടുത്താൻ പറ്റാത്ത കാര്യങ്ങളാണ്. ഇത്രയും വർഷം ആയത് കൊണ്ട് പിന്നെ പ്രശ്നമില്ല.” ജോസഫ് നെല്ലിക്കൽ പറഞ്ഞു.
Read more
സ്റ്റുഡിയോയിൽ റീവൈൻഡ് ചെയ്തപ്പോഴാണ് ഇത് കണ്ടതെന്നും, ഒരു ഹൈപ്പിന് വേണ്ടി അമൽ നീരദാണ് അത് ഡോറാക്കി മാറ്റിയതെന്നും സില്ലിമോങ്ക്സ് മോളിവുഡിന് നൽകിയ അഭിമുഖത്തിൽ ജോസഫ് നെല്ലിക്കൽ പറഞ്ഞു.
