പിറന്നാള്‍ ദിനത്തില്‍ പുതിയ മാസ് ചിത്രത്തിന്റെ ടീസര്‍ പുറത്തുവിട്ട് നയന്‍താര. ‘റക്കായി’ എന്നാണ് പുതിയ ചിത്രത്തിന്റെ പേര്. അരിവാളെടുത്ത് ശത്രുക്കളെ വെട്ടിവീഴ്ത്തുന്ന നയന്‍താരയെയാണ് ടീസറില്‍ അവതരിപ്പിച്ചിരിക്കുന്നത്. ഗംഭീര ആക്ഷന്‍ രംഗങ്ങളാണ് ടീസറിലുള്ളത്. സെന്തില്‍ നല്ലസാമിയാണ് ചിത്രം സംവിധാനം ചെയ്യുന്നത്.
ഷി ഡിക്ലയേഴ്‌സ് വാര്‍ എന്ന ടാഗ് ലൈനോടെ ഇന്നലെ ചിത്രത്തിന്റെ പോസ്റ്റര്‍ പുറത്തെത്തിയിരുന്നു. പിന്നാലെയാണ് ടീസര്‍ എത്തിയത്. നിറയെ വയലന്‍സ് ഉള്ള ഒരു പീരീഡ് ചിത്രമാകും എന്നാണ് ടീസര്‍ നല്‍കുന്ന സൂചന. ഡ്രംസ്റ്റിക്‌സ് പ്രൊഡക്ഷന്‍സ് & മൂവി വേഴ്‌സ് സ്റ്റുഡിയോസ് ആണ് ചിത്രം നിര്‍മ്മിക്കുന്നത്.
ഗോവിന്ദ് വസന്ത സംഗീതം നല്‍കുന്ന സിനിമയുടെ ഛായാഗ്രഹണം നിര്‍വഹിക്കുന്നത് ഗൗതം രാജേന്ദ്രന്‍ ആണ്. പ്രവീണ്‍ ആന്റണി ആണ് ചിത്രം എഡിറ്റ് ചെയ്യുന്നത്. അതേസമയം, പിറന്നാള്‍ ദിനത്തില്‍ നയന്‍താരയുടെ വിവാഹ ഡോക്യുമെന്ററിയായ ‘നയന്‍താര: ബിയോണ്ട് ദി ഫെയറി ടെയ്ല്‍’ നെറ്റ്ഫ്‌ളിക്‌സില്‍ സ്ട്രീമിങ് ആരംഭിച്ചിട്ടുണ്ട്.
നയന്‍താരയുടെ കരിയറും പ്രണയവും വിവാഹവുമെല്ലാം പറയുന്ന നെറ്റ്ഫ്‌ളിക്‌സ് ഡോക്യുമെന്ററിയാണിത്. വിവാദങ്ങള്‍ക്കിടെയാണ് ഡോക്യുമെന്ററി എത്തിയിരിക്കുന്നത്. നയന്‍താര നാനും റൗഡി താന്‍ സിനിമയുടെ നിര്‍മ്മാതാവ് കൂടിയായ ധനുഷിനെതിരെ പരസ്യമായി രംഗത്തെത്തിയതോടെയാണ് വിവാദം ഉടലെടുത്തത്.
സിനിമയിലെ മൂന്ന് സെക്കന്‍ഡ് ദൃശ്യങ്ങള്‍ ഉപയോഗിച്ചതിന്റെ പേരില്‍ ധനുഷ് 10 കോടിയുടെ വക്കീല്‍ നോട്ടീസ് അയച്ചതാണ് വിവാദങ്ങള്‍ക്ക് തുടക്കമിട്ടത്. ധനുഷിനെതിരെ തുറന്ന കത്തുമായാണ് നയന്‍താര രംഗത്തെത്തിയിരുന്നു. പ്രതികാരദാഹിയായ ഏകാധിപതിയെന്ന് വിളിച്ച് രൂക്ഷമായ ഭാഷയിലായിരുന്നു നയന്‍താരയുടെ പ്രതികരണം.
എന്നാല്‍ 24 മണിക്കൂറിനകം ഡോക്യുമെന്ററിയിലെ മൂന്ന് സെക്കന്‍ഡ് ദൃശ്യങ്ങള്‍ നീക്കം ചെയ്യണമെന്ന അന്ത്യശാസനയുമായി ധനുഷ് രംഗത്തെത്തിയിട്ടുണ്ട്. ഈ ദൃശ്യങ്ങള്‍ മാറ്റിയില്ലെങ്കില്‍ നയന്‍താരയ്ക്കും നെറ്റ്ഫ്‌ളിക്‌സിനുമെതിരെ 10 കോടി രൂപ നഷ്ടപരിഹാരം ആവശ്യപ്പെട്ട് നിയമനടപടി സ്വീകരിക്കും എന്നാണ് ധനുഷിന്റെ അഭിഭാഷകന്‍ വ്യക്തമാക്കുന്നത്.
