കൈവശക്കാര്‍ക്കും കുടികിടപ്പുകാര്‍ക്കും കൃഷിക്കാര്‍ക്കും വേണ്ടി ഇടതുപക്ഷ സര്‍ക്കാര്‍ നിലകൊണ്ടതിന്റെ ഉല്പന്നമാണ് ആധുനിക കേരളമെന്നും മുനമ്പത്ത് നിന്ന് ആരെയും ഒഴുപ്പിക്കുന്ന പ്രശ്‌നമില്ലെന്നും സിപിഎം സംസ്ഥാന സെക്രട്ടറി എം വി ഗോവിന്ദന്‍. ഒരു കുടിയൊഴിപ്പിക്കലിനെയും സിപിഎം അഗീകരിക്കില്ല. മുനമ്പം അല്ല കേരളത്തില്‍ എവിടെയായാലും അവര്‍ താമസിക്കുന്ന ഭൂമിയില്‍ നിന്നും ഒഴിപ്പിക്കാന്‍ ആരെയും അനുവദിക്കില്ല.
വര്‍ഗീയ ധ്രുവീകരണമാണ് ബിജെപിയുടെ ഏറ്റവും പ്രധാനപ്പെട്ട നയം. ഞങ്ങള്‍ ഉള്ളിടത്തോളം മുസ്ലീങ്ങള്‍ക്ക് ഒരു സംരക്ഷണവും നല്‍കില്ല എന്നാണ് അമിത് ഷാ കഴിഞ്ഞ ദിവസവും ഉറപ്പിച്ചു പറഞ്ഞത്. മുനമ്പത്ത് സമരം കാലങ്ങളായി നടക്കുന്നുണ്ട്. ഇത് സര്‍ക്കാരിന് മാത്രം പരിഹരിക്കാനാകുന്ന വിഷയമല്ല. സര്‍ക്കാര്‍ സമരക്കാര്‍ക്ക് ഒപ്പമാണ്. മനുഷ്യവകാശ പ്രശ്നമെന്ന നിലയില്‍ മുനമ്പത്തുകാര്‍ക്ക് കരം അടക്കാനുള്ള അനുമതി റവന്യൂവകുപ്പ് നല്‍കിയിരുന്നു.
എന്നാല്‍ വഖഫ് സംരക്ഷണ സമിതിക്കാരുടെ ഹര്‍ജിയില്‍ കോടതിയാണ് സര്‍ക്കാര്‍ തീരുമാനത്തിന് സ്റ്റേ നല്‍കിയത്. സിപിഎം ന്യൂനപക്ഷ പ്രീണനം നടത്തുകയാണെന്നു പറയുന്ന വെല്‍ഫെയര്‍ പാര്‍ടി ബിജെപിയുടെ കൗണ്ടര്‍ പാര്‍ട്ടാണ്. എന്താണോ ഭൂരിപക്ഷത്തിന്റെയും ഹിന്ദുക്കളുടെ പേരില്‍ ബിജെപിയും ആര്‍എസ്എസും ചെയ്യുന്നത് അത് തന്നെയാണ് ന്യൂനപക്ഷത്തിന്റെ പേര് പറഞ്ഞ് വെല്‍ഫെയര്‍ പാര്‍ടി ചെയ്യുന്നത്. വര്‍ഗീയ ദ്രുവീകരണം നടത്താന്‍ മാത്രമാണ് ജമാഅത്തെ ഇസ്ലാമി ശ്രമിക്കുന്നതെന്നും ഗോവിന്ദന്‍ പറഞ്ഞു.
