ഓണ്‍ലൈന്‍ വായ്പാ ആപ്പില്‍ നിന്ന് കടമെടുത്ത വയനാട് അരിമുള സ്വദേശി അജയ് രാജിന്റെ ആത്മഹത്യയില്‍ പൊലീസിന് കൂടുതല്‍ വിവരങ്ങള്‍ ലഭിച്ചു. ആത്മഹത്യയ്ക്ക് അഞ്ച് മിനുട്ട് മുന്‍പും അജയുടെ ഫോണില്‍ മോര്‍ഫ് ചെയ്ത അശ്ലീല ചിത്രങ്ങള്‍ അയച്ചുള്ള ഭീഷണി സന്ദേശമെത്തിയെന്നാണ് പൊലീസ് കണ്ടെത്തല്‍. സംഭവം ആത്മഹത്യയ്ക്ക് പ്രേരണയായതായാണ് പൊലീസിന്റെ പ്രാഥമിക നിഗമനം.
ക്യാന്‍ഡി ക്യാഷ് എന്ന ഓണ്‍ലൈന്‍ ആപ്പ് വഴിയാണ് അജയ് രാജ് കടമെടുത്തത്. ധനകാര്യ സ്ഥാപനങ്ങളില്‍ നിന്നും നാട്ടിലെ സുഹൃത്തുക്കളില്‍ നിന്നും അജയ് കടം വാങ്ങിയിരുന്നു. ഓണ്‍ലൈന്‍ ആപ്പ് വഴിയെടുത്ത കടം അജയ് തിരിച്ചടച്ചിരുന്നോ എന്നതില്‍ വ്യക്തത ഇല്ല. പണം തിരിച്ചടച്ച ശേഷവും ഭീഷണി തുടര്‍ന്നിരുന്നോ എന്നും പരിശോധിക്കേണ്ടതുണ്ട്. അജയുടെ ഫോണ്‍ ശാസ്ത്രീയ പരിശോധനയ്ക്ക് വിധേയമാക്കിയാല്‍ മാത്രമേ ഇത്തരം കാര്യങ്ങളില്‍ വ്യക്തത വരുത്താന്‍ സാധിക്കൂവെന്ന് പൊലീസ് അറിയിച്ചു.
അജയുടെ ഫോണ്‍ ശാസ്ത്രീയ പരിശോധനയ്ക്ക് വിധേയമാക്കി അന്വേഷണം ഊര്‍ജ്ജിതമാക്കാനുള്ള തയ്യാറെടുപ്പിലാണ് പൊലീസ്. എറണാകുളം കടമക്കുടിയില്‍ രണ്ട് കുട്ടികള്‍ ഉള്‍പ്പെടെ നാല് പേര്‍ ജീവനൊടുക്കിയ സംഭവത്തില്‍ ആത്മഹത്യ ചെയ്ത ദമ്പതികളുടെ ഫോണ്‍ ഫോറന്‍സിക് പരിശോധനക്കയച്ചു. കാക്കനാട് ലാബില്‍ നിന്നും പരമാവധി വേഗത്തില്‍ പരിശോധന ഫലം നേടാനാണ് പൊലീസ് ശ്രമം.
Read more
ആത്മഹത്യ ചെയ്ത ദമ്പതികളുടെ സാമ്പത്തിക ഇടപാടുകള്‍ സംബന്ധിച്ച വിവരങ്ങള്‍, ഫോണില്‍ ഇന്‍സ്റ്റാള്‍ ചെയ്ത ഓണ്‍ലൈന്‍ വായ്പാ ആപ്പ്, തട്ടിപ്പ് സംഘവുമായി നടത്തിയ ഇടപാടുകള്‍ എന്നിവയാണ് പരിശോധിക്കുക. കൂടാതെ തട്ടിപ്പ് സംഘം അയച്ച സന്ദേശങ്ങള്‍ നഷ്ടപ്പെട്ടിടുണ്ടെങ്കില്‍ അവ വീണ്ടെടുക്കാനും ശ്രമിക്കും. തുടരന്വേഷണത്തില്‍ ഈ വിവരങ്ങള്‍ നിര്‍ണായകമാകും.
