അനധികൃതമായി മൃഗക്കടത്ത് നടത്തുന്ന വൻ സംഘത്തെ പിടികൂടി സ്‌പെയ്ൻ പൊലീസ്. അതിസാഹസികമായി അറസ്റ്റ് ചെയ്ത സംഘത്തിന്റെ പക്കൽ നിന്ന് കണ്ടെത്തിയത് പട്ടിയും പൂച്ചയും അടക്കം നാന്നൂറിലേറെ മൃഗങ്ങളെയാണ്. ഈ മൃഗങ്ങളില്‍ പലതും വിപണിയില്‍ ഉയര്‍ന്ന മൂല്യമുള്ള ഇനങ്ങളാണെന്നും ഇവയെ ഓണ്‍ലൈനില്‍ അനധികൃതമായി വാങ്ങിയതാണെന്നും പൊലീസ് അറിയിച്ചു.
കിഴക്കൻ യൂറോപ്പിൽ നിന്ന് അൻഡോറ വഴി സ്‌പെയിനിലേക്ക് അനധികൃതമായി മൃഗങ്ങളെ ഇറക്കുമതി ചെയ്ത സംഘം, അമിത ലാഭത്തിനായി അവയെ വിൽക്കാന്‍ ശ്രമിച്ചതായി പോലീസ് സംശയിക്കുന്നു. ആരോഗ്യമുള്ള മൃഗങ്ങളാണെന്ന് വ്യാജരേഖ ചമച്ച് ഇവയെ വിൽപന നടത്തിയതായാണ് കണ്ടെത്തൽ. മൃഗങ്ങളെ ഉപദ്രവിക്കൽ, വഞ്ചന, കള്ളപ്പണം വെളുപ്പിക്കൽ തുടങ്ങിയ കുറ്റങ്ങൾ ചുമത്തി സംഘത്തിലെ 13 പേരെയും പൊലീസ് അറസ്റ്റ് ചെയ്തു.
ബാഴ്‌സലോണയിലെ പൊലീസ് ഉദ്യോഗസ്ഥർക്ക് നഗരമധ്യത്തിലെ ഒരു പെറ്റ് ഷോപ്പിലെ മോശം അവസ്ഥയെക്കുറിച്ച് നിരവധി പരാതികൾ ലഭിച്ചതിനെ തുടര്‍ന്നാണ് പൊലീസ് രാത്രിയില്‍ അതീവ രഹസ്യമായി പെറ്റ്ഷോപ്പില്‍ പരിശോധന നടത്തിയത്. ഇവിടെ നിന്നും ഉയർന്ന വിപണി മൂല്യമുള്ള ഇനങ്ങളടക്കം 33 നായ്ക്കളെ കണ്ടെത്തി. കഴിഞ്ഞ സെപ്തംബറിലാണ് പെറ്റ് ഷോപ്പില്‍ രഹസ്യ റെയ്ഡ് നടന്നതെന്ന് ബിബിസി റിപ്പോര്‍ട്ട് ചെയ്യുന്നു.
ഇവിടെ പെണ്‍മൃഗങ്ങളെ അവയുടെ ആരോഗ്യം പോലും ശ്രദ്ധിക്കാതെ കൂടുതൽ കുഞ്ഞുങ്ങളെ ഉത്പാദിപ്പിക്കാനായി ഉപയോഗിച്ചെന്നും പോലീസ് പറയുന്നു. മൃഗങ്ങളെ വൃത്തിഹീനമായ പലപ്പോഴും ഇടുങ്ങിയ വാഹനങ്ങളില്‍ ഏതാണ്ട് 2,000 ത്തോളം കിലോമീറ്റര്‍ വരെയുള്ള ദീര്‍ഘദൂര യാത്രകള്‍ക്ക് കൊണ്ട് പോയത് വഴി പകർച്ചവ്യാധികള്‍ പല സ്ഥലങ്ങളിലും പടരുന്നതിന് കാരണമായെന്നും പൊലീസ് പറയുന്നു. മൃഗങ്ങള്‍ക്ക് സര്‍ട്ടിഫിക്കറ്റുകള്‍ നല്‍കുന്നതിനായി സംഘത്തില്‍ ഒരു വെറ്ററനറി ഡോക്ടറും ഉണ്ടായിരുന്നു.
കഴിഞ്ഞ മാസം മൃഗങ്ങളുടെ വിൽപ്പനയും ഉടമസ്ഥതയും നിയന്ത്രിക്കുന്ന കർശന നിയമം സ്‌പെയിൻ പാസാക്കിയിരുന്നു. പെറ്റ് സ്റ്റോറുകളിലൂടെയുള്ള അവയുടെ വിൽപ്പന നിരോധിക്കുന്നതും ഈ നയമത്തില്‍പ്പെടുന്നു. നിയമ ലംഘനങ്ങൾക്ക് ജയിൽ ശിക്ഷയോ 2,00,000 യൂറോ (1,76,16,200 രൂപ) വരെ പിഴയോ ലഭിക്കും.
Read more
വംശനാശം തടയാനും ഭൂമിയില്‍ മൃഗങ്ങൾക്ക് സംരക്ഷണം ഒരുക്കുന്നതിനും ഒപ്പം അതുവഴിയുള്ള കരിഞ്ചന്ത അവസാനിപ്പിക്കുന്നതിനും വേണ്ടിയാണ് മൃഗക്കടത്ത് തടയുന്നതിന് ലോക രാജ്യങ്ങൾ നിയമങ്ങൾ പാസാക്കിയിട്ടുള്ളത്. എന്നാല്‍, ഭരണകൂടങ്ങളെ കബളിപ്പിച്ച് ഇപ്പോഴും അനധികൃതമായി മൃഗക്കടത്ത് നടത്തുന്ന സംഘങ്ങള്‍ മിക്ക രാജ്യങ്ങളിലും സജീവമാണ്.
