തങ്ങൾക്കുള്ള സ്വത്തുക്കളിൽ പകുതിയിലേറെയും ദാനം ചെയ്യുമെന്ന് പ്രഖ്യാപിച്ച് ഓപ്പൺ എഐ മേധാവി സാം ഓൾട്ട്മാനും പങ്കാളി ഒലിവർ മുൽഹറിനും. ഇതിന്റെ ഭാഗമായി ഗിവിങ് പ്ലെഡ്‌ജിൽ ഇരുവരും ഒപ്പിട്ടു. ലോകത്തെ സമ്പന്നരായ വ്യക്തികളോട് അവരുടെ സ്വത്തിൽ ഭൂരിഭാഗവും മനുഷ്യസ്നേഹത്തിനായി ദാനം ചെയ്യൂവെന്നും ഇരുവരും ആഹ്വാനം ചെയ്തു.
ബിൽഗേറ്റ്സ്, മെലിൻഡ ഫ്രെഞ്ച് ഗേറ്റ്സ്, വാറൻ ബഫറ്റ് എന്നിവർ 2010 ൽ തുടക്കമിട്ട ഗിവിങ് പ്ലെഡ്‌ജിലാണ് സാം ഓൾട്ട്മാനും പങ്കാളി ഒലിവർ മുൽഹറിനും ഒപ്പിട്ടത്. ഇതിലൂടെ തങ്ങൾക്കുള്ള സ്വത്തുക്കളിൽ പകുതിയിലേറെയും ദാനം ചെയ്യുമെന്ന് ഇരുവരും പ്രഖ്യാപിക്കുകയായിരുന്നു. തങ്ങളുടെ യാത്രയിൽ പിന്തുണ നൽകിയവർക്ക് ഓൾട്ട്മാനും മുൽഹറിനും നന്ദിയും അറിയിച്ചു.
മനുഷ്യ നന്മയ്ക്കായി തൻ്റെ സമ്പത്ത് വിനിയോഗിക്കുമെന്നാണ് ഗിവിങ് പ്ലെഡ്‌ജിലൂടെ ഓൾട്ട്മാൻ പ്രഖ്യാപിച്ചിരിക്കുന്നത്. സമൂഹത്തിന് പ്രയോജനം ചെയ്യുന്ന സാങ്കേതിക മുന്നേറ്റങ്ങളിൽ ശ്രദ്ധ കേന്ദ്രീകരിക്കുന്നതിലൂടെ വിഭവങ്ങൾ സമൃദ്ധമായി ലഭിക്കുകയും മനുഷ്യർക്ക് കൂടുതൽ അവവസരങ്ങൾ ലഭ്യമാവുകയും ചെയ്യുന്ന ഭാവിക്ക് വേണ്ടി സംഭാവന നൽകാൻ ഓൾട്ട്മാൻ ലക്ഷ്യമിടുന്നു.
ഓപ്പൺ എഐയിൽ ഓൾട്ട്മാന് ഓഹരി ഇല്ലെങ്കിലും മറ്റ് വിവിധ കമ്പനികളിലെ നിക്ഷേപങ്ങളിലൂടെ ഫോർബ്‌സിൻ്റെ ശതകോടീശ്വരന്മാരുടെ പട്ടികയിൽ ഇടം പിടിച്ച ഒരാളാണ് ഓൾട്ട്മാൻ. റെഡ്ഡിറ്റ്, സ്ട്രൈപ്പ്, ആണവോർജ സ്റ്റാർട്ടപ്പായ ഹീലിയോൺ, ബയോടെക്ക് സ്റ്റാർട്ടപ്പായ റെട്രോ ബയോസയൻസസ് എന്നിവയിൽ ഓൾട്ട്മാന് ഓഹരിയുണ്ട്. റിയൽ എസ്റ്റേറ്റ് രംഗത്തും ഓൾട്ട്മാൻ പ്രവർത്തിക്കുന്നുണ്ട്.
അതേസമയം നിരവധി പ്രമുഖർ ഗിവിങ് പ്ലെഡ്‌ജിൻ്റെ ഭാഗമായിട്ടുണ്ട്. മക്കൻസി സ്കോട്ട്, റെയ്ഡ്‌ ഹോഫ്‌മാൻ, മാർക് ബെനിയോഫ്, ഇലോൺ മസ്ക്, ലാരി എല്ലിസൺ, മാർക്ക് സക്കർബർഗ്, പ്രിസില്ല ചാൻ എന്നിവരാണ് ഗിവിങ് പ്ലെഡ്‌ജിൻ്റെ ഭാഗമായിട്ടുള്ളവരിൽ ചിലർ.
