ഐ.പി.എല്‍ ചരിത്രത്തിലെ തന്നെ റെക്കോര്‍ഡ് തുകയ്ക്ക് രാജസ്ഥാന്‍ റോയല്‍സ് സ്വന്തമാക്കിയ ദക്ഷിണാഫ്രിക്കന്‍ ഓള്‍ റൗണ്ടറാണ് ക്രിസ് മോറിസ്. ഇന്നലെ കൊല്‍ക്കത്തയ്‌ക്കെതിരായ മത്സരത്തില്‍ മോറിസിന്‍രെ ബോളിംഗ് പ്രകടനം ടീമിന് മുതല്‍ക്കൂട്ടാകുകയും ചെയ്തു. മോറിസിന്റെ ഈ പ്രകടനം ഇംഗ്ലണ്ട് മുന്‍ താരം കെവിന്‍ പീറ്റേഴ്സണ് നല്ല ക്ഷീണമാണ് സമ്മാനിച്ചിരിക്കുന്നത്.
അടുത്തിടെ മോറിസിനെതിരെ വിമര്‍ശനവുമായി പീറ്റേഴ്സണ് രംഗത്തെത്തിയിരുന്നു. തന്റെ ഐ.പി.എല്‍ കരിയറിലാകെ ലഭിച്ചതിനെക്കാള്‍ തുകയാണ് മോറിസിനൊക്കെ ഒരു സീസണില്‍ നല്‍കുന്നതെന്നും എന്തിനാണ് ഇത്രയും തുകയൊക്കെ മുടക്കി അദ്ദേഹത്തെ ടീമിലെടുക്കുന്നതെന്നുമാണ് പീറ്റേഴ്സണ് ചോദിച്ചത്. ബാംഗ്ലൂരിനെതിരായ മത്സരത്തിലെ മോറിസിന്റെ മോശം പ്രകടനത്തിന് പിന്നാലെയായിരുന്നു പീറ്റേഴ്‌സണിന്റെ പരിഹാസം.
കൊല്‍ക്കത്തയ്‌ക്കെതിരായ മത്സരത്തിലെ പ്രകടനത്തിലൂടെ മോറിസ് പീറ്റേഴ്‌സണുള്ള മറുപടി നല്‍കിയിരിക്കുകയാണ്. നാലോവറില്‍ 23 റണ്‍സ് മാത്രം വഴങ്ങി നാല് വിക്കറ്റുകളാണ് മോറിസ് വീഴ്ത്തിയത്. കാര്‍ത്തിക്ക്, റസല്‍, കമ്മിന്‍സ് തുടങ്ങിയ വമ്പന്‍ സ്രാവുകളായിരുന്നു മോറിസിന്റെ ഇരകള്‍.
Read more
മത്സരത്തില്‍ അച്ചടക്കത്തോടെയുള്ള ബോളിംഗ് ഫീള്‍ഡിംഗ് പ്രകടനം പുറത്തെടുത്ത രാജസ്ഥാന്‍ കൊല്‍ക്കത്തയെ 133 ലൊതുക്കി. മറുപടി ബാറ്റിംഗില്‍ നാല് വിക്കറ്റ് മാത്രം നഷ്ടപ്പെടുത്തി ലക്ഷ്യം മറികടന്ന് രാജസ്ഥാന്‍ ആറ് വിക്കറ്റിന്റെ വിജയം ആഘോഷിക്കുകയും ചെയ്തു. മത്സരത്തില്‍ നായകന്‍ സഞ്ജു സാംസണ്‍ 42 റണ്‍സുമായി പുറത്താകാതെ നിന്നു.
