ജനുവരി 10ന് ആരംഭിക്കുന്ന അയർലൻഡിനെതിരായ ഏകദിന പരമ്പരയ്ക്കുള്ള ഇന്ത്യൻ ടീമിലേക്ക് കേരള ഓൾറൗണ്ടർ മിന്നു മണിയെ തിരിച്ചുവിളിച്ചു. ഡിസംബറിൽ ഓസ്‌ട്രേലിയൻ പര്യടനത്തിലെ രണ്ടാം മത്സരത്തിലാണ് മിന്നു ഏകദിനത്തിൽ അരങ്ങേറ്റം കുറിച്ചത്. ഇന്ത്യ പരമ്പര 3-0ന് തോറ്റെങ്കിലും രണ്ട് വിക്കറ്റും പുറത്താകാതെ 46 റൺസുമായി മിന്നു മണി അന്ന് മതിപ്പുളവാക്കി. തുടർന്ന് നടന്ന വെസ്റ്റ് ഇൻഡീസിനെതിരായ മൂന്ന് മത്സര ഏകദിന പരമ്പരയിൽ വയനാട്ടിൽ ജനിച്ച താരം പങ്കെടുത്തിരുന്നില്ല.
ക്യാപ്റ്റൻ ഹർമൻപ്രീത് കൗറും രേണുക സിങ് താക്കൂറും ഇല്ലാത്ത 15 അംഗ ടീമിൻ്റെ ക്യാപ്റ്റനായി സ്മൃതി മന്ദാനയെ നിയമിച്ചു. കൗറിനും താക്കൂറിനും വിശ്രമം അനുവദിച്ചതായി ബിസിസിഐ അറിയിച്ചു. പരമ്പരയുടെ ഷെഡ്യൂൾ: ജനുവരി 10, ജനുവരി 12, ജനുവരി 15. എല്ലാ മത്സരങ്ങളും രാജ്‌കോട്ടിലെ നിരഞ്ജൻ ഷാ സ്റ്റേഡിയത്തിൽ രാവിലെ 11 മണിക്ക് ആരംഭിക്കും.
സ്‌ക്വാഡ്: സ്മൃതി മന്ദാന (സി), ദീപ്തി ശർമ (വിസി), പ്രതീക റാവൽ, ഹർലീൻ ഡിയോൾ, ജെമീമ റോഡ്രിഗസ്, ഉമാ ചേത്രി (ഡബ്ല്യുകെ), റിച്ച ഘോഷ് (ഡബ്ല്യുകെ), തേജൽ ഹസാബ്നിസ്, രാഘ്വി ബിസ്റ്റ്, മിന്നു മണി, പ്രിയ മിശ്ര, തനൂജ കൻവർ, ടിറ്റാസ് സാധു, സൈമ താക്കൂർ, സയാലി സത്ഘരെ
