ദക്ഷിണാഫ്രിക്കയ്ക്കെതിരെ സ്വന്തം ഗ്രൗണ്ടില്‍ തന്റെ വിടവാങ്ങല്‍ ടെസ്റ്റ് കളിക്കാന്‍ അവസരം ലഭിക്കാത്തതില്‍ ബംഗ്ലാദേശ് ഓള്‍റൗണ്ടര്‍ ഷാക്കിബ് അല്‍ ഹസന്‍ ഇപ്പോഴും വേദനയിലാണ്. പ്രാദേശിക ആരാധകര്‍ക്ക് മുന്നില്‍ തന്റെ കരിയര്‍ അവസാനിപ്പിക്കാന്‍ വെറ്ററന്‍ ആഗ്രഹിച്ചിരുന്നു. എന്നാല്‍ ബംഗ്ലാദേശ് ക്രിക്കറ്റ് ബോര്‍ഡ് അദ്ദേഹത്തിന് സുരക്ഷ നല്‍കാന്‍ വിസമ്മതിക്കുകയും രാജ്യത്ത് നിന്ന് മാറിനില്‍ക്കാന്‍ നിര്‍ബന്ധിക്കുകയും ചെയ്തു.
ഇതിനോടുള്ള വിയോജിപ്പ് എന്നോണം അഫ്ഗാനിസ്ഥാനെതിരായ ഏകദിന പരമ്പര ഒഴിവാക്കാനാണ് ഷാക്കിബ് ഇപ്പോള്‍ തീരുമാനിച്ചിരിക്കുന്നത്. ഷാക്കിബ് അഫ്ഗാനിസ്ഥാനെതിരെ മൂന്ന് ഏകദിനങ്ങള്‍ കളിക്കില്ലെന്ന് ബിസിബി (ബംഗ്ലാദേശ് ക്രിക്കറ്റ് ബോര്‍ഡ്) പ്രസിഡന്റ് ഫാറൂഖ് അഹമ്മദ് വെളിപ്പെടുത്തി.
ബംഗ്ലാദേശില്‍ ഒരു വിടവാങ്ങല്‍ ടെസ്റ്റ് കളിക്കുന്നതില്‍ പരാജയപ്പെട്ടതിന് ശേഷം ഷാക്കിബിന് സുഖം പ്രാപിക്കാന്‍ കുറച്ച് സമയം ആവശ്യമാണെന്ന് അദ്ദേഹം കരുതുന്നു. ഇന്ത്യയ്ക്കെതിരായ രണ്ട് ടെസ്റ്റുകളുടെ പരമ്പരയിലാണ് അദ്ദേഹം അവസാനമായി കളിച്ചത്, ഇപ്പോള്‍ ബംഗ്ലാ കടുവകള്‍ക്ക് വേണ്ടി അബുദാബി ടി10 ലീഗില്‍ കളിക്കും.
ഷക്കീബ് മുന്‍ സര്‍ക്കാരിന്റെ കാലത്ത് പാര്‍ലമെന്റ് അംഗമായിരുന്നു. രാജ്യത്തെ രാഷ്ട്രീയ അനിശ്ചിതത്വത്തില്‍ മകന്‍ കൊല്ലപ്പെട്ടതിന് പിന്നാലെ താരത്തിനെതിരെയും നിരവധി പേര്‍ക്കെതിരെയും ഒരാള്‍ പരാതി നല്‍കിയിരുന്നു. ഇതിനു പിന്നാലെയാണ് താരത്തിന്റെ സുരക്ഷയ്ക്ക് ഭീഷണി കല്‍പ്പിക്കപ്പെട്ടത്.
