ഇംഗ്ലണ്ടിനായി കളിച്ച 24 ടെസ്റ്റുകളില്‍ ഇംഗ്ലണ്ടിന്റെ മധ്യനിര ബാറ്റര്‍ ഹാരി ബ്രൂക്ക് മികച്ച പ്രകടനമാണ് നടത്തിയത്. 68.48 ശരാശരിയുള്ള 25 കാരനായ താരം ഇംഗ്ലണ്ടിനെ നിരവധി മത്സരങ്ങളില്‍ വിജയിപ്പിക്കുന്നുണ്ട്. ക്യാപ്റ്റന്‍ ബെന്‍ സ്റ്റോക്സിന്റെയും ഹെഡ് കോച്ച് ബ്രണ്ടന്‍ മക്കല്ലത്തിന്റെയും ബാസ്ബോള്‍ സമീപനത്തോട് യോജിച്ച് പ്രവര്‍ത്തികുന്ന താരം ഇതിനോടകം റെഡ് ബോള്‍ ക്രിക്കറ്റില്‍ 8 സെഞ്ച്വറികളും 10 അര്‍ധസെഞ്ച്വറികളും നേടിയിട്ടുണ്ട്.
ഇതിനിടെ ഓസ്ട്രേലിയയുടെ മുന്‍ താരവും ഇന്ത്യയുടെ മുന്‍ പരിശീലകനുമായ ഗ്രെഗ് ചാപ്പല്‍ ബ്രൂക്കിനെ സച്ചിന്‍ ടെണ്ടുല്‍ക്കറുമായി താരതമ്യം ചെയ്തു. ഇംഗ്ലീഷ് ബാറ്റര്‍ വിനാശകരമായ പ്രകടനം വിലയിരുത്തുമ്പോള്‍ താരം ഇതിനോടകം സച്ചിന്‍ ടെണ്ടുല്‍ക്കറിനെ മറികടന്നെന്നാണ് ചാപ്പല്‍ അവകാശപ്പെടുന്നത്.
ഞാന്‍ ബ്രൂക്കിന്റെ പ്രകടനത്തെ സച്ചിന്‍ ടെണ്ടുല്‍ക്കറുമായി താരതമ്യം ചെയ്യുന്നു. രണ്ട് ബാറ്റര്‍മാരുടെ ആദ്യകാല സ്ഥിതിവിവരക്കണക്കുകള്‍ പരിഗണിച്ചാല്‍ അദ്ദേഹം സച്ചിനെക്കാള്‍ മികച്ച പ്രകടനം കാഴ്ചവെച്ചു
ബ്രൂക്കിന് 25 വയസ്സേയുള്ളൂ, ഇതിനകം തന്നെ ഏറ്റവും കൂടുതല്‍ ചര്‍ച്ച ചെയ്യപ്പെടുന്ന ക്രിക്കറ്റ് കളിക്കാരില്‍ ഒരാളാണ്. അദ്ദേഹത്തിന്റെ വിനാശകരമായ ബാറ്റിംഗ് രീതി ഗുണം ചെയ്തു. സച്ചിന്‍ ടെണ്ടുല്‍ക്കറെ പോലെ ക്രീസില്‍ അവന്‍ അധികം ചലിക്കുന്നില്ല.
ബ്രൂക്കിന്റെ സാങ്കേതികത അവനെ ഡെലിവറികളുടെ ലൈനും ലെങ്തും വായിക്കാന്‍ അനുവദിക്കുന്നു. ഇത് സ്‌ട്രോക്കുകള്‍ കളിക്കാന്‍ കൂടുതല്‍ സമയം നല്‍കുന്നു. മിക്ക പന്തുകളിലും അദ്ദേഹം റണ്‍സ് നേടുന്നു. ഹാരി ബ്രൂക്കും സച്ചിനും പേസ് തങ്ങളുടെ നേട്ടത്തിനായി ഉപയോഗിക്കുന്നു- ചാപ്പല്‍ കൂട്ടിച്ചേര്‍ത്തു.
ആദ്യ 15 ടെസ്റ്റുകളില്‍ 40ല്‍ താഴെ ശരാശരിയില്‍ 837 റണ്‍സാണ് സച്ചിന്‍ നേടിയത്. മറുവശത്ത് ഹാരി ബ്രൂക്ക് 60ന് അടുത്ത് ശരാശരിയില്‍ 1378 റണ്‍സ് നേടിയിട്ടുണ്ട്. അതില്‍ അഞ്ച് സെഞ്ച്വറികളും ഉള്‍പ്പെടുന്നു. 24 മത്സരങ്ങളിലെ 40 ഇന്നിംഗ്സില്‍നിന്ന് 2281 റണ്‍സാണ് ബ്രൂക്ക് നേടിയത്. 317 റണ്‍സാണ് ഉയര്‍ന്ന സ്‌കോര്‍.
