ഇത്തവണത്തെ ബാലൺ ഡി ഓർ പ്രഖ്യാപിച്ചപ്പോൾ പുരസ്കാരം നേടുന്നത് ബ്രസീലിയൻ താരമായ വിനീഷ്യസ് ജൂനിയർ ആയിരിക്കും എന്നാണ് എല്ലാവരും കരുതിയിരുന്നത്. എന്നാൽ ഫ്രാൻസ് ഫുട്ബോൾ ഇത്തവണ തിരഞ്ഞെടുത്തത് സ്പാനിഷ് താരമായ റോഡ്രിയെ ആയിരുന്നു. അതിലെ വിവാദം ഇത് വരെയായി കെട്ടടങ്ങിയിട്ടില്ല. യോഗ്യത നോക്കുകയാണെങ്കിൽ റോഡ്രിയെക്കാൾ ഏറ്റവും അർഹത ഉള്ളത് വിനിക്കാണ് എന്നാണ് ആരാധകർ അഭിപ്രായപ്പെടുന്നത്.
ബാലൺ ഡി ഓർ നഷ്ടപ്പെട്ടതിൽ നിരാശയിലാണ് വിനി ഇപ്പോൾ. എന്നാൽ അദ്ദേഹത്തിന് പിന്തുണയുമായി രംഗത്ത് എത്തിയിരിക്കുകയാണ് ബ്രസീൽ പരിശീലകനായ ഡോറിവാൽ ജൂനിയർ. താരത്തോട് കാണിച്ചത് കടുത്ത അനീതിയാണ് എന്നാണ് അദ്ദേഹം പറഞ്ഞിട്ടുള്ളത്.
ഡോറിവാൽ ജൂനിയർ പറയുന്നത് ഇങ്ങനെ:
“എന്റെ അഭിപ്രായത്തിൽ അദ്ദേഹത്തോട് കാണിച്ചത് നീതികേടാണ്. കാരണം ഇതൊരു വ്യക്തിഗത അവാർഡ് ആണ്. ആ അവാർഡ് നേടിയ വ്യക്തിയോട് വിരോധമൊന്നുമില്ല. സ്പാനിഷ് ഫുട്ബോളിലെ ഏറ്റവും മികച്ച താരങ്ങളിൽ ഒരാളാണ് അദ്ദേഹം. പക്ഷേ വിനീഷ്യസ് ചെയ്ത കാര്യങ്ങൾ നോക്കുമ്പോൾ അദ്ദേഹം അർഹിച്ചിരുന്നു”
ഡോറിവാൽ ജൂനിയർ തുടർന്നു:
“എന്നാൽ വിനീഷ്യസ് നേടിയ ഏറ്റവും വലിയ പുരസ്കാരം ആളുകളിൽ നിന്നുള്ള അഭിനന്ദനങ്ങളും അംഗീകാരങ്ങളുമാണ്. വിനീഷ്യസാണ് പുരസ്കാരം അർഹിച്ചതെന്നും നടന്നത് തികഞ്ഞ നീതികേടാണ് എന്നും ഭൂരിഭാഗം വരുന്ന ബ്രസീലിയൻ ആരാധകരും മനസ്സിലാക്കിയിട്ടുണ്ട് “ ഡോറിവാൽ ജൂനിയർ പറഞ്ഞു.
