ലോകത്തെ ഏറ്റവും ജനപ്രിയ ആപ്പുകളിൽ ഒന്നാണ് വാട്സാപ്പ്. കോടിക്കണക്കിന് ഉപയോക്താക്കളുള്ള വാട്സാപ്പ് കഴിഞ്ഞ ഒരു പതിറ്റാണ്ടിനിടയിൽ ഇന്ത്യയിൽ ഏറ്റവും ജനപ്രീതി നേടിയ ആപ്പുകളിൽ ഒന്നാണ്. വാട്സാപ്പ് ഉപയോക്താക്കളുടെ സ്വകാര്യ സംഭാഷണങ്ങൾ ചോർത്തപ്പെടുന്നുണ്ടോ എന്നുള്ള വിവാദമാണ് ഇപ്പോൾ ലോകത്തെ ചർച്ചാവിഷയം. ഈ വിഷയത്തിൽ ആശങ്ക പങ്കുവെച്ച് പലരും സാമൂഹമാധ്യമങ്ങളിലും രംഗത്തെത്തിയിരുന്നു.
നമ്മൾ ഉറങ്ങുന്ന സമയത്തും വാട്സാപ്പിന്റെ മൈക്രോ ഫോൺ പ്രവർത്തിക്കുന്നുണ്ട് എന്ന വിചിത്ര ട്വീറ്റുമായി ആദ്യം എത്തിയത് ട്വിറ്റർ എഞ്ചീനീയറായ ഫോഡ് ഡാബിരിയായിരുന്നു. തെളിവായി തന്റെ പിക്സൽ ഫോണിലെ പ്രൈവസി ഡാഷ് ബോർഡിന്റെ സ്ക്രീൻ ഷോട്ടും അദ്ദേഹം ട്വീറ്റിൽ പങ്കുവച്ചിരുന്നു.പുലർച്ചെ 4.20 മുതൽ 6.53 വരെ ബാക്ഗ്രൌണ്ടിൽ വാട്സാപ്പ് ഫോണിലെ മൈക്രോഫോൺ ആക്സസ് ചെയ്തതതായാണ് സ്ക്രീൻ ഷോട്ടിൽ കാണിക്കുന്നത്.
ട്വിറ്റർ സിഇഓ ഇലോൺ മസ്ക് ഡാബിരിയുടെ ട്വീറ്റിന് മറുപടിയുമായി എത്തിയതോടെയാണ് വിഷയം ലോകശ്രദ്ധ ആകർഷിച്ചത്. വാട്സാപ്പിനെ വിശ്വസിക്കാൻ കൊള്ളില്ലെന്നാണ് സംഭവത്തിൽ ഇലോൺ മസ്കിന്റെ മറുപടി.എന്നാൽ ആശങ്കക്ക് വ്യക്തത വരുത്തി വാട്സാപ്പ് തന്നെ ഇപ്പോൾ രംഗത്തെത്തിയിരിക്കുകയാണ്.
Read more
ഗൂഗിളിനും ഈ ബഗിനെക്കുറിച്ച് അറിയാമെന്നും പ്രശ്നം ഉടനടി പരിഹരിക്കപ്പെടുമെന്നും വാട്സാപ്പ് ഉപയോക്താക്കൾ ഉറപ്പു നൽകി. ഇതൊരു ബഗ് മാത്രമാണെന്നും ആപ്പ് ഉടമയറിയാതെ ഫോണിലെ മൈക്രോഫോൺ ആക്സസ് ചെയ്യുന്നില്ലെന്നുമാണ് വാട്സാപ്പിന്റെ വിശദീകരണം. കോൾ റെക്കോർഡിലും വോയ്സ് നോട്ടിലും മാത്രമാണ് വാട്സാപ്പിന് റെക്കോർഡ് ചെയ്യാനാവുകയുള്ളു എന്നാണ് വിശദീകരണം.
