’12ത് ഫെയില്‍’ എന്ന സിനിമ ഒരുക്കി അടുത്തിടെ ഏറെ ശ്രദ്ധ നേടിയ സംവിധായകനാണ് വിധു വിനോദ് ചോപ്ര. നിരവധി ഹിറ്റ് സിനിമകള്‍ ഒരുക്കിയ ബോളിവുഡ് സംവിധായകന്‍ കൂടിയാണ് വിധു വിനോദ് ചോപ്ര. അമിതാഭ് ബച്ചനുമായുള്ള രസകരമായ ഒരു അനുഭവം പങ്കുവച്ചിരിക്കുകയാണ് സംവിധായകന്‍ ഇപ്പോള്‍.
ബിഗ് ബിക്ക് കോടികള്‍ വിലമതിക്കുന്ന കാര്‍ സമ്മാനിച്ചതിന് അമ്മ തന്നെ തല്ലിയിട്ടുണ്ട് എന്നാണ് സംവിധായകന്‍ പറയുന്നത്. 2007ല്‍ പുറത്തിറങ്ങിയ സിനിമ ‘ഏകലവ്യ’യില്‍ വിധു വിനോദ് ചോപ്രയും ബച്ചനും ഒന്നിച്ചിരുന്നു. സെറ്റില്‍ വലിയ ദേഷ്യക്കാരനാണ് സംവിധായകന്‍.
”എന്നെ സഹിച്ചതിനും സിനിമയില്‍ മികച്ച പ്രകടനം കാഴ്ചവച്ചതിനും ഞാന്‍ അദ്ദേഹത്തിന് 4.5 കോടി വിലയുള്ള റോള്‍സ് റോയ്സ് സമ്മാനിച്ചു. ഈ സംഭവം ഞാന്‍ ഒരിക്കലും മറക്കില്ല. അമിതാഭിന് കാര്‍ സമ്മാനിക്കാനായി പോയപ്പോള്‍ ഞാന്‍ അമ്മയേയും കൂട്ടിയാണ് പോയത്. അമ്മയാണ് അദ്ദേഹത്തിന് വണ്ടിയുടെ താക്കോല്‍ സമ്മാനിച്ചത്.”
”തിരിച്ചു വന്ന് എന്റെ കാറിലിരുന്നു. അന്ന ഞാന്‍ നീല മാരുതി വാനാണ് ഓടിച്ചിരുന്നത്. ആ സമയത്ത് ഞാന്‍ ഡ്രൈവറെ വച്ചിരുന്നില്ല. അതിനാല്‍ ഞാനാണ് ഡ്രൈവ് ചെയ്തിരുന്നത്. നീയാണോ അവന് കാര്‍ നല്‍കിയത് എന്ന് അമ്മ എന്നോട് ഞാന്‍ ചോദിച്ചു. അതെ എന്നു പറഞ്ഞപ്പോള്‍ നീ എന്താണ് പുതിയ കാര്‍ വാങ്ങിക്കാത്തത് എന്ന് ചോദിച്ചു.”
”സമയമുണ്ടല്ലോ കാര്‍ വാങ്ങാം എന്ന് ഞാന്‍ പറഞ്ഞു. ഇത് 11 ലക്ഷത്തിന്റെ കാര്‍ ആണല്ലേ എന്നാണ് അപ്പോള്‍ അമ്മ ചോദിച്ചത്. കാറിന്റെ വില 4.5 കോടി ആണെന്ന് അമ്മയ്ക്ക് അറിയില്ലായിരുന്നു. അതിനാല്‍ ഞാന്‍ ചിരിച്ചുകൊണ്ട് വില പറഞ്ഞു. അതുകേട്ടതും മണ്ടന്‍ എന്നു വിളിച്ച് അമ്മ എന്നെ തല്ലി. ഞാനത് ഒരിക്കലും മറക്കില്ല” എന്നാണ് വിധു വിനോദ് ചോപ്ര പറയുന്നത്.
