മോഹന്‍ലാലുമായി അടുത്ത സൗഹൃദം സൂക്ഷിക്കുന്നയാളാണ് നടന്‍ നന്ദു. മോഹന്‍ലാല്‍ തന്നെ ബിഗ് ബോസിലേക്ക് ക്ഷണിച്ചതിനെ കുറിച്ചാണ് നന്ദു ഇപ്പോള്‍ പറഞ്ഞിരിക്കുന്നത്. താന്‍ 50 ലക്ഷം രൂപയാണ് രണ്ടാഴ്ചത്തേക്ക് ചോദിച്ചത്. എന്നാലും വീട്ടുകാരും നാട്ടുകാരും എതിര്‍ത്തത് കൊണ്ട് പോയില്ല എന്നാണ് നന്ദു പറയുന്നത്.
മുന്‍ ബിഗ് ബോസ് മത്സരാര്‍ത്ഥിയായ ശോഭ വിശ്വനാഥുമായി സംസാരിക്കുമ്പോഴാണ് നന്ദു ഇക്കാര്യം പറഞ്ഞത്. ”ഒരു ദിവസം രാത്രി 11 മണിക്ക് ലാലേട്ടന്‍ എന്നെ വിളിച്ചു. നാളെ നിന്നെ ബോംബെയില്‍ നിന്ന് വിളിക്കും. എന്തായാലും വരണമെന്ന് പറഞ്ഞു. സീസണ്‍ 4 ആണെന്ന് തോന്നുന്നു. രണ്ടാഴ്ചത്തേക്ക് ആണ് വിളിച്ചത്.”
”പക്ഷേ എനിക്ക് തീരെ താല്പര്യമുണ്ടായിരുന്നില്ല. ഒരാഴ്ച അവിടെ പോയി ക്വറന്റൈനില്‍ താമസിക്കണമല്ലോ. എന്നോട് അതൊന്നും വേണ്ടെന്നാണ് പറഞ്ഞത്. ഒന്നുമില്ലെങ്കില്‍ രണ്ടു ദിവസത്തേക്ക് എങ്കിലും വന്നാല്‍ മതിയെന്ന് പറഞ്ഞു. രണ്ടാഴ്ചത്തേക്ക് പ്രതിഫലമായി ഞാന്‍ 50 ലക്ഷം ചോദിച്ചു. അവര്‍ 40 ലക്ഷം വരെ പറഞ്ഞു.”
”വീട്ടുകാരും നാട്ടുകാരുമൊക്കെ എന്തുപറയും എന്ന് വിചാരിച്ച് ഞാന്‍ പോയില്ല” എന്നാണ് നന്ദു പറയുന്നത്. ഇതിനിടെ മാധ്യമപ്രവര്‍ത്തകര്‍ നന്ദു അടുത്ത ബിഗ് ബോസിലേക്ക് പോകുമോ എന്ന് ചോദിച്ചുവെങ്കിലും അതിനുള്ള മറുപടി താരം നല്‍കിയില്ല.
