ക്രിസ്മസിന് പ്രേക്ഷകരുടെ മുന്നിലേക്ക് സാന്റാക്ലോസായി ദിലീപ് എത്തുന്ന ചിത്രമാണ് മൈ സാന്റാ. സുഗീത് സംവിധാനം ചെയ്യുന്ന ചിത്രം ദിലീപിന്റെ സാന്റാ കഥാപാത്രവും ഒരു കുട്ടിയും തമ്മിലുള്ള ബന്ധത്തിന്റെ കഥയാണ് പറയുന്നത്. ചിത്രത്തില്‍ കുട്ടിത്താരമായി എത്തുന്നത് മാനസിയാണ്. കഴിഞ്ഞ ദിവസം ചിത്രത്തിന്റെ ഓഡിയോ ലോഞ്ച് നടന്നിരുന്നു. ചടങ്ങിനിടെ ദിലീപ് മാനസിയെക്കുറിച്ച് പറഞ്ഞ കാര്യങ്ങള്‍ സോഷ്യല്‍ മീഡിയയില്‍ ശ്രദ്ധ നേടിയിരിക്കുകയാണ്.
ഷൂട്ടിംഗിനെത്തിയപ്പോള്‍ മാനസി എന്നെ അങ്കിള്‍ എന്നാണ് വിളിച്ചിരുന്നത്. അങ്ങനെ വിളിക്കല്ലേ, ചേട്ടാ എന്ന് വിളിച്ചാല്‍ മതിയെന്ന് ഞാന്‍ മാനസിയോട് പറഞ്ഞു. ഇതേ പ്രായത്തില്‍ അങ്കിള്‍ എന്ന് വിളിച്ച കീര്‍ത്തി സുരേഷും സനുഷയുമൊക്കെ എന്റെ നായികമാരായി അഭിനയിച്ചിട്ടുണ്ട്. രജനി സാറിനെ മാനസി എന്താണ് വിളിക്കുന്നതെന്നറിഞ്ഞപ്പോള്‍ ഞാന്‍ ശരിക്കും ഞെട്ടി. രജനി ചേട്ടാ എന്നാണ് വിളിക്കുന്നത്. അദ്ദേഹത്തെ അങ്ങനെ വിളിക്കുന്നൊരാളെ ഞാനാദ്യമായി കാണുകയാണ്” ദിലീപ് പറഞ്ഞു. ദര്‍ബാര്‍ എന്ന സിനിമയില്‍ രജനികാന്തിനൊപ്പവും മാനസി അഭിനയിച്ചിട്ടുണ്ട്. രജനികാന്തിന്റെ നായികയായി അഭിനയിക്കണമെന്നാണ് മാനസിയുടെ ആഗ്രഹം.
ദിലീപിനോടൊപ്പം സണ്ണി വെയ്ന്‍, ഷൈന്‍ ടോം ചാക്കോ, സായ് കുമാര്‍, സിദ്ധിഖ്, കലാഭവന്‍ ഷാജോണ്‍, സുരേഷ് കൃഷ്ണ, സാദ്ദിഖ്, ഇര്‍ഷാദ്, ഇന്ദ്രന്‍സ്, ധര്‍മ്മജന്‍ ബോള്‍ഗാട്ടി, ശശാങ്കന്‍, ധീരജ് രത്‌നം, അനുശ്രീ, മഞ്ജു പത്രോസ്, ബേബി മാനസ്വി, ബേബി ദേവനന്ദ തുടങ്ങിയവരും അഭിനയിക്കുന്നു. അനുശ്രീയാണ് ചിത്രത്തില്‍ നായിക. ചന്ദ്രേട്ടന്‍ എവിടെയാ എന്ന ചിത്രത്തിന് ശേഷം ഇരുവരും ഒന്നിക്കുന്ന ചിത്രമാണിത്.
Read more
വാള്‍ പോസ്റ്റര്‍ എന്റര്‍ടൈയ്ന്‍മെന്റ്‌സിന്റെ ബാനറില്‍ നിഷാദ് കോയ, അജീഷ് ഒ കെ, സരിത സുഗീത് എന്നിവര്‍ ചേര്‍ന്ന് നിര്‍മ്മിക്കുന്ന ഈ ചിത്രത്തിന്റെ തിരക്കഥ, സംഭാഷണം ജെമിന്‍ സിറിയക് ആണ് നിര്‍വ്വഹിച്ചിരിക്കുന്നത്. ഫൈസല്‍ അലി ഛായാഗ്രഹണം നിര്‍വ്വഹിക്കുന്നു. സന്തോഷ് വര്‍മ്മ, നിഷാദ് അഹമ്മദ് എന്നിവരുടെ വരികള്‍ക്ക് വിദ്യാസാഗര്‍ സംഗീതം പകരുന്നു. ഡിസംബര്‍ 25 ന് ചിത്രം തിയേറ്ററുകളിലെത്തും.
