തിയേറ്ററുകളില്‍ രംഗണ്ണന്‍ തരംഗം. നിലവില്‍ 66.25 കോടി രൂപ നേടി ‘ആവേശം’ ആഗോള ബോക്‌സ് ഓഫീസില്‍ കുതിക്കുകയാണ്. ഇതിനിടെ ജിത്തു മാധവിന്റെ മുന്‍ ചിത്രമായ ‘രോമാഞ്ച’ത്തില്‍ ചെമ്പന്‍ വിനോദ് അവതരിപ്പിച്ച സെയ്ദ് എന്ന കഥാപാത്രവുമായി ആവേശത്തിലെ രംഗന് എന്തെങ്കിലും സാമ്യതകളുണ്ടോ എന്ന ചോദ്യത്തോട് പ്രതികരിച്ചിരിക്കുകയാണ് സംവിധായകന്‍.
രോമാഞ്ചവുമായി ആവേശത്തിന് യാതൊരു ബന്ധവുമില്ലെന്ന് ജിത്തു നേരത്തെ അറിയിച്ചിരുന്നു. എന്നാല്‍ ഒരു സാമ്യത സോഷ്യല്‍ മീഡിയ കണ്ടെത്തിയിരിക്കുകയാണ്. രോമാഞ്ചത്തിലെ ചെമ്പന്റെയും ആവേശത്തിലെ രംഗണ്ണന്റെയും വണ്ടി നമ്പര്‍ 4316 ആണ് എന്നതാണ് ആ സാമ്യത.
ആ സാമ്യതക്ക് പിന്നിലെ കാരണത്തെ കുറിച്ച് തുറന്നു പറഞ്ഞിരിക്കുകയാണ് ജിത്തു മാധവന്‍ ഇപ്പോള്‍. ”ആവേശത്തിന്റെ ഷൂട്ടിംഗ് തുടങ്ങുന്നതിന് തൊട്ടുമുമ്പാണ് രോമാഞ്ചം റിലീസ് ചെയ്യുന്നത്. രോമാഞ്ചം റിലീസായതിന്റെ ആവേശത്തില്‍ നില്‍ക്കുമ്പോഴാണ് അസിസ്റ്റന്റ് ഡയറക്ടര്‍ വണ്ടിക്ക് എന്ത് നമ്പര്‍ ഇടണം എന്ന് ചോദിക്കുന്നത്.”
”ഞാന്‍ പറഞ്ഞു 4316. അത് ആ സമയത്തെ ആവേശത്തില്‍ പറഞ്ഞു പോയതാണ്. അല്ലാതെ മറ്റൊരു ബന്ധവുമില്ല” എന്നാണ് ജിത്തു പറയുന്നത്. രോമാഞ്ചത്തിലെ ചെമ്പന്റെ കഥാപാത്രത്തിന്റേത് പോലെയുള്ള വേഷം തന്നെയാണ് ഫഹദിന് ആവേശത്തില്‍. ഇത് ആദ്യം തന്നെ ചര്‍ച്ച ചെയ്യപ്പെട്ടിരുന്നു. എന്നാല്‍ ആവേശം രോമാഞ്ചത്തിന്റെ സ്പിന്‍ ഓഫ് അല്ലെന്ന് ജിത്തു വ്യക്തമാക്കിയിരുന്നു.
