ദേശീയ പുരസ്കാര നേട്ടത്തിന് പിന്നാലെ പ്രതികരണവുമായി ഋഷഭ് ഷെട്ടി. അവാർഡ് തനിക്കാണെന്ന് പലരും പറഞ്ഞെങ്കിലും വാർത്താസമ്മേളനത്തിൽ ജൂറി മത്സരഫലം പ്രഖ്യാപിക്കുന്നതുവരെ തനിക്ക് അത് വിശ്വസിക്കാൻ കഴിഞ്ഞില്ലെന്നാണ് ഋഷഭ് ഷെട്ടി പറയുന്നത്.
അതേസമയം മമ്മൂട്ടിയെ കുറിച്ചും താരം പ്രതികരിച്ചു. മമ്മൂട്ടിയുടെ സിനിമകൾ മത്സരത്തിന് ഉണ്ടായിരുന്നുവോ എന്ന് തനിക്ക് അറിയില്ലെന്നും, മമ്മൂട്ടി ഒരു ഇതിഹാസമാണെന്നും അദ്ദേഹത്തിന്റെ മുൻപിൽ നിൽക്കാനുള്ള ശക്തി തനിക്കില്ലെന്നും ഋഷഭ് ഷെട്ടി പറഞ്ഞു.
“ഞാൻ ഇതു പ്രതീക്ഷിച്ചിരുന്നില്ല. പലരും എനിക്കാണ് അവാർഡെന്ന് പറഞ്ഞെങ്കിലും വാർത്താസമ്മേളനത്തിൽ ജൂറി അതു പ്രഖ്യാപിക്കുന്നതു വരെ ഞാൻ അക്കാര്യം വിശ്വസിച്ചില്ല. പുരസ്കാര വാർത്ത അറിഞ്ഞ് ആദ്യം എന്നെ അഭിനന്ദിക്കുന്നത് എന്റെ ഭാര്യയാണ്. കാന്താരയിലെ കഥാപാത്രത്തെ ജൂറി വിലയിരുത്തി അതു തിരഞ്ഞെടുത്തുവെന്ന് ഞാൻ വിശ്വസിക്കുന്നു. ജൂറിക്ക് സിനിമ ഇഷ്ടപ്പെട്ടു. അതിന് അവർക്ക് കാരണങ്ങളുണ്ടാകാം. ജൂറിക്ക് നന്ദി.”
മമ്മൂട്ടി സാറിന്റെ സിനിമ മത്സരത്തിന് ഉണ്ടായിരുന്നോയെന്ന് എനിക്ക് അറിയില്ല. സമൂഹമാധ്യമത്തിൽ അത്തരം വാർത്തകൾ കണ്ടിരുന്നു. എന്നാൽ, ജൂറിയുടെ മുൻപിലുള്ളത് ഏതൊക്കെ ചിത്രങ്ങളാണെന്ന് എനിക്ക് അറിയില്ല. മമ്മൂട്ടി സർ ഒരു ഇതിഹാസമാണ്. അദ്ദേഹത്തെപ്പോലുള്ള മഹാനടന്റെ മുൻപിൽ നിൽക്കാനുള്ള ശക്തി എനിക്കില്ല. മമ്മൂട്ടിയെപ്പോലുള്ള ഇതിഹാസതാരങ്ങൾ മത്സരത്തിനുണ്ടായിരുന്നെങ്കിൽ ഞാൻ എന്നെത്തന്നെ വലിയ ഭാഗ്യവാനായി കാണുന്നു.” എന്നാണ് മാധ്യമങ്ങളോട് ഋഷഭ് ഷെട്ടി പറഞ്ഞത്.
Read more
ആനന്ദ് ഏകർഷി സംവിധാനം ചെയ്ത ‘ആട്ടം’ ആണ് മികച്ച ചിത്രമായി തിരഞ്ഞെടുക്കപ്പെട്ടത്. മികച്ച തിരക്കഥ, ചിത്രസംയോജനം തുടങ്ങീ വിഭാഗങ്ങളിലും ആട്ടം പുരസ്കാരം സ്വന്തമാക്കിയിരുന്നു.
നിത്യ മേനോനും മാനസി പരേഖുമാണ് മികച്ച നടിമാർ. മികച്ച മലയാള ചിത്രമായി തരുൺ മൂർത്തി സംവിധാനം ചെയ്ത സൗദി വെള്ളക്ക തിരഞ്ഞെടുക്കപ്പെട്ടു.
