ധനുഷ് ചിത്രത്തില്‍ വീണ്ടും മലയാളി നായിക; ആദ്യ തെലുങ്ക് ചിത്രം, 'വാത്തി' പോസ്റ്റര്‍

By
എന്‍റര്‍ടൈന്‍മെന്‍റ് ഡെസ്ക്
|

ധനുഷ് നായകനാകുന്ന പുതിയ ചിത്രം ‘വാത്തി’യുടെ ടൈറ്റില്‍ പോസ്റ്റര്‍ പുറത്ത്. വെങ്കി അറ്റിലൂരി തിരക്കഥയെഴുതി സംവിധാനം ചെയ്യുന്ന ചിത്രമാണ് വാത്തി. വിദ്യാര്‍ത്ഥികളുള്ള ഒരു ക്ലാസ് മുറിയിലെ ബോര്‍ഡ് ആണ് പോസ്റ്ററിലുള്ളത്. വീണ്ടും ഒരു മലയാളി താരം ധനുഷിന്റെ നായികയാകുന്ന എന്ന പ്രത്യേകതയും ചിത്രത്തിനുണ്ട്.

സംയുക്ത മേനോന്‍ ആണ് ചിത്രത്തില്‍ ധനുഷിന്റെ നായികയാവുന്നത്. ‘സര്‍’ എന്ന പേരില്‍ തമിഴിനൊപ്പം തന്നെ തലുങ്കിലും ചിത്രം റിലീസ് ചെയ്യും. ധനുഷിന്റെ ആദ്യ തെലുങ്ക് ചിത്രം കൂടിയാണ് സര്‍. നാഗവംശി എസും, സായ് സൗജന്യയും ചേര്‍ന്നാണ് നിര്‍മ്മാണം.

ഒരുപാട് സ്വപ്നങ്ങളുള്ള കോളേജ് അധ്യാപകനായ ഒരു സാധാരണ മനുഷ്യന്റെ കഥയാണ് വാത്തി പറയുന്നത്. വിദ്യാഭ്യാസത്തിന്റെ സ്വകാര്യവല്‍ക്കരണത്തിനെതിരെ പോരാടുന്ന യുവാവിന്റെ കഥയാണ് ചിത്രത്തിന്റെ പ്രമേയം. ജി.വി പ്രകാശ് സംഗീതം ഒരുക്കും.

ഷൂട്ടിംഗ് ഉടന്‍ ആരംഭിക്കുമെന്നാണ് റിപ്പോര്‍ട്ടുകള്‍. അതേസമയം, അക്ഷയ് കുമാറിനും സാറാ അലി ഖാനുമൊപ്പമുള്ള അത്രംഗി രേ ആണ് ധനുഷിന്റെ റിലീസ് ചെയ്യാനിരിക്കുന്ന പുതിയ ചിത്രം. ക്രിസ്മസ് റിലീസായി ഈ മാസം 24ന് ആണ് ചിത്രം റിലീസ് ചെയ്യുക.