തന്റെ പുതിയ ചിത്രം 2018 പ്രേക്ഷകര്‍ ഇരുകൈകളും നീട്ടി സ്വീകരിച്ചതിന്റെ സന്തോഷത്തിലാണ് സംവിധായകന്‍ ജൂഡ് ആന്തണി ജോസഫ്. അതേസമയം ജൂഡ് സോഷ്യല്‍ മീഡിയയില്‍ പങ്കുവച്ച പുതിയ പോസ്റ്റ് സിനിമാപ്രേമികള്‍ക്കിടയില്‍ ചര്‍ച്ചയാവുകയാണ്. മോഹന്‍ലാലിനൊപ്പമുള്ള ഒരു ചിത്രമാണ് ഇന്‍സ്റ്റഗ്രാമിലൂടെ അദ്ദേഹം പങ്കുവച്ചിരിക്കുന്നത്.
ഫേസ്ബുക്കിലൂടെ ജൂഡ് പലപ്പോഴും പങ്കുവച്ചിട്ടുള്ള ചിത്രമാണ് ഇത്. മോഹന്‍ലാലിന് പിറന്നാള്‍ ആശംസകള്‍ നേര്‍ന്നും മറ്റൊരിക്കല്‍ മോഹന്‍ലാലിനൊപ്പം പ്രവര്‍ത്തിക്കാനുള്ള ആഗ്രഹം അറിയിച്ചുകൊണ്ടും ഇതേ ചിത്രം ജൂഡ് പങ്കുവച്ചിരുന്നു.
പുതിയ പോസ്റ്റിന് താഴെ കമന്റ് ബോക്‌സിലും ഇത്തരത്തില്‍ ഒരു സിനിമ സംഭവിക്കുമോ എന്ന ചോദ്യമാണ് സിനിമാപ്രേമികള്‍ ചോദിക്കുന്നത്. നേരത്തെ ലാല്‍ജോസ് സംവിധാനം ചെയ്ത വെളിപാടിന്റെ പുസ്തകം എന്ന ചിത്രത്തില്‍ ജൂഡ് മോഹന്‍ലാലിനൊപ്പം അഭിനയിച്ചിരുന്നു.
അതേസമയം 2018 വലിയ ഹിറ്റായി മാറുകയാണ്. വെള്ളിയാഴ്ച തിയേറ്ററുകളിലെത്തിയ ചിത്രം സെക്കന്‍ഡ് ഷോകള്‍ക്കു ശേഷം വെള്ളി, ശനി ദിവസങ്ങളില്‍ പല സെന്ററുകളിലും അധിക പ്രദര്‍ശനങ്ങളും നടന്നു. പുറത്തെത്തിയ കണക്കുകള്‍ പ്രകാരം 1.85 കോടിയാണ് റിലീസ് ദിനത്തില്‍ ചിത്രത്തിന്റെ കേരള കളക്ഷന്‍.
Read more
രണ്ടാം ദിനം ഇരട്ടിയിലേറെ, 3.2- 3.5 കോടി റേഞ്ചില്‍ കേരളത്തില്‍ നിന്ന് മാത്രം ചിത്രം നേടിയെന്നും റിപ്പോര്‍ട്ടുകള്‍ വരുന്നുണ്ട്. മൂന്ന് ദിവസം നീളുന്ന ആദ്യ വാരാന്ത്യ ബോക്‌സ് ഓഫീസില്‍ ചിത്രം സമീപകാല മലയാള സിനിമയില്‍ റെക്കോര്‍ഡ് ഇടുമെന്നത് ഉറപ്പാണ്.
